Khandesh Rainfall : पावसाची पाठच; ‘हतनूर’मधून विसर्ग घटला

Jalgoan News : खानदेशात पावसाने अनेक दिवसांपासून पाठ फिरविली आहे. सर्वदूर पाऊस नसल्याने पीकस्थिती अपेक्षित नाही. हतनूरसह अन्य मध्यम, लघू प्रकल्पांतून पाण्याचा विसर्ग बंद करण्यात आला आहे.

खानदेशात काही दिवसांपूर्वी काही भागांत हलका पाऊस होता. तर काही भागांत तुरळक, अल्प पाऊस अशी स्थिती होती. पण मागील सात ते आठ दिवसांपासून पाऊस नाही. जळगाव जिल्ह्यात जळगाव, धरणगाव, चोपडा, एरंडोल, पारोळा, अमळनेर, धुळ्यातील शिरपूर, नंदुरबारमधील शहादा, तळोदा, नवापूर भागांत पाऊस नाही. पावसाची तूट जुलैत राहिली आहे.

सरासरीपेक्षा कमी पाऊस जुलैमध्ये झाला. धुळे व जळगाव जिल्ह्यात जूनमध्ये पावसाने सरासरी गाठली होती. तर जूनमध्ये सुमारे आट टक्के पावसाची तूट नंदुरबारमध्ये होती. मध्यंतरी काही भागात तुरळक, अल्प असा पाऊस झाला. ढगाळ वातावरण मात्र कायम असायचे. कोरडे, सूर्यप्रकाशित वातावरण नव्हते. आता काही दिवसांत उकाडा वाढला आहे. पाऊसमान सर्वत्र सारखे नसल्याने अडचणी येत आहेत.

जुलैच्या दुसऱ्या, तिसऱ्या आठवड्यातील पेरण्यांवर चांगला पाऊस अनेक भागांत झालेला नाही. होते. सध्या दिवसभर ढगाळ वातावरण, उकाडा, अशी स्थिती आहे. उष्णताही वाढत आहे. यामुळे हलक्या, मुरमाड जमिनींमधील वाफसा नाहीसा होऊन पावसाची गरज निर्माण झाली आहे.

शेतीकामे तुरळक

खानदेशात पावसाअभावी शेतीकामे ठप्प झाली आहेत. ज्या भागात मागील आठवड्यात कमी पाऊस होता, त्या भागात वाफसा होऊन जमीन कडक, कोरडी बनली आहे. काही भागांत तणनियंत्रण व फवारणीचे काम सुरू आहे. अन्य भागांत सतत पाऊस नसल्याने फवारणी, आंतरमशागतीची कामे पूर्ण होऊन आता कामे बंद आहेत. शेतकरीदेखील आता फवारणी व अन्य शेती कामांतील गुंतवणूक कमी करू लागले आहेत.

अनेक प्रकल्पांतून विसर्गच नाही

पावसाचे जोदार आगमन यंदा झालेच नाही. अनेक प्रकल्प रिकामे आहेत. दुसरीकडे धुळ्यात साक्रीमधील जामखेल, तापीवरील सुलवाडे बॅरेज, नंदुरबारमधील प्रकाशा व सारंगखेडा बॅरेज, जळगावातील हतनूर धरणासह शेळगाव बॅरेजमधील विसर्ग घटला आहे.

जळगाव जिल्ह्यात चाळीसगाव भागात मध्यंतरी बरा पाऊस झाला. परंतु अन्य भागांत पाऊस नव्हता. चाळीसगावच्या पाटणादेवी भागात नद्यांना तेवढे यंदा पाणी आले. पण अन्यत्र पाऊस नसल्याने स्थिती बिकट आहे.