Mumbai News : रसायनी परिसरात रविवारी सकाळी सहाच्या सुमारास विजांच्या कडकडाटासह आलेल्‍या पावसामुळे भात झोडणीची काम सुरू असलेल्या शेतकऱ्यांची तारांबळ उडाली.
हाताशी आलेले पीक वाया जाऊ नये म्‍हणून ताडपत्री तसेच प्लॉस्‍टिकच्या मदतीने भाताचे भारे झाकण्यात आले. तर पाऊस सुरू होताच वासांबे-मोहोपाडा परिसरात वीज पुरवठा खंडित झाल्‍याने नागरिकांची गैरसोय झाली. रब्‍बी हंगामातील लागवडीलाही पावसामुळे फटका बसला आहे.
बहुतांश शेतकऱ्यांची कापणीचे कामे पूर्ण झाली असून दिवाळीमुळे अनेकांनी कापणी केलेला भात शेतावर रचून ठेवला होता. तर काही ठिकाणी झोडणीला सुरुवात झाली होती.दरम्यान दोन दिवसांपासून हवामानात बदल झाला होता. रविवारी (ता. २६ ) सकाळपासूनच पावसाने हजेरी लावल्‍याने नागरिकांची मोठी तारांबळ उडाली. वैरण आणि पेंढा भिजल्‍याचे तळेगावातील शेतकरी नारायण पाटील यांनी सांगितले.
‘त्रिपुरारी’वरही पावसाचे सावट
रेवदंडा : अलिबाग तालुक्यातील चौल-रेवदंडा परिसरातील विविध मंदिरात त्रिपुरारी पौर्णिमा मोठ्या भक्तिभावाने व उत्साहात साजरी झाली. रविवारी पावसाच्या शिडकाव्यामुळे पावसाचे सावट होते.
रेवदंड्याचे ग्रामदैवत असलेल्या श्री हनुमान मंदिरात कच्च्या दोऱ्याचा काकडा पेटवून त्रिपुरारी पौर्णिमा साजरी करण्यात आली. मंदिरासमोरील दीपमाळा सजवण्यात आल्या होत्या, रांगोळी काढल्‍या होत्या. अनेकांनी सकाळीच मंदिरात दर्शन घेतले. विठ्ठल-रखुमाई मंदिर, गणपती मंदिर, नारायण मंदिर परिसरात दीपमाळांवर त्रिपूर लावले होते. चौलचे पुरातन गणेश मंदिर, पर्वतवासी दत्तमंदिर, भगवती देवी, रामेश्वर मंदिरात त्रिपूर लावल्‍याने परिसर उजळला होता.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.