![Agriculture Export](http://media.assettype.com/agrowon%2F2024-04%2F168e8b9a-5724-43a4-af27-ff2563847f2d%2FNews_Story_Mahesh___2024_04_09T171246_037.jpg?w=480&auto=format%2Ccompress&fit=max)
Pune News : पायाभूत सुविधांवरील ताण, सातत्याने होत असलेली वाहतूक कोंडी, व्यापारासाठी कमी पडत असलेली जागा अशा अनेक समस्यांच्या गर्तेत पुणे बाजार समितीमध्ये व्यापार सुरू आहे. अपुऱ्या जागेमुळे पुणेकरांना जीवनावश्यक बाबी पुरविण्यात अडथळा निर्माण होत आहे.
त्यामुळे वाढत्या शहराच्या गरजा लक्षात घेता अत्याधुनिक बाजार आवार निर्माण करावे, त्यासाठी रिंगरोडवर विमानतळाला कनेक्ट असलेली २०० एकरहून अधिक जागा उपलब्ध करून द्यावी, अशी मागणी श्री छत्रपती शिवाजी मार्केट यार्ड (Shree Chhatrapati Shivaji Market Yard) अडते असोसिएशनने केली आहे.
मार्केड यार्डमधील व्यापाऱ्यांच्या समस्या आणि त्यावर काय उपाययोजना करता येतील, यावर चर्चा करत कामकाजाची माहिती देण्यासाठी असोसिएशनच्या पदाधिकाऱ्यांनी ‘सकाळ’च्या कार्यालयाला सदिच्छा भेट दिली.
असोसिएशनचे अध्यक्ष अनिरुद्ध (बापू) भोसले, सचिव करण जाधव, खजिनदार तात्यासाहेब कोंडे, उपाध्यक्ष गणेश शेडगे, संचालक प्रशांत बांदल आणि फिरोज साचे या वेळी उपस्थित होते. ‘सकाळ’च्या कार्यकारी संपादक शीतल पवार आणि ‘ॲग्रोवन’चे संपादक संचालक आदिनाथ चव्हाण यांनी असोसिएशनच्या पदाधिकाऱ्यांचे स्वागत केले.
जागा अपुरी पडत असल्याने मुंबर्इतील वाशी बाजार समिती स्थलांतरित करण्याच्या हालचाली सुरू आहेत. त्यानुसार पुण्यातील बाजार आवार स्थलांतरित करावे. तेथे सर्व पायाभूत सुविधांसह शेतीमाल साठवणूक आणि निर्यातीसाठी अत्याधुनिक सुविधा आणि व्यापारासाठी आवश्यक बाबी उपलब्ध करून द्याव्यात.
तसे झाल्यास बाजार आवारातील गर्दी कमी होर्इल. व्यापारवाढीस मदत मिळेल. कोल्ड स्टोअरेज, लोडिंग अनलोडिंग सुविधा, पार्किंग, स्वच्छतागृह, ऑफिस स्पेस, मोठे गाळे उपलब्ध होतील, अशी आशा पदाधिकाऱ्यांनी व्यक्त केली. या वेळी आदिनाथ चव्हाण यांनी भविष्यातील बाजारपेठेचा वेध घेत व्यापाऱ्यांच्या विविध प्रश्नांबाबत मार्गदर्शन केले.
असोसिएशनने केलेल्या मागण्या
- लोडिंग-अनलोडिंगसह वाहतूक, कोल्ड स्टोअरेज अशा अद्ययावत सुविधा द्याव्यात
- थेऊरच्या कारखान्याची जागा बाजार समितीने घ्यावी
- शेतीमाल निर्यातीसाठी लागणाऱ्या सुविधा उपलब्ध करून द्याव्यात
- मार्केटमध्ये पायाभूत सुविधा निर्माण कराव्यात
- पुण्याजवळ वाशीसारखे मोठे मार्केट निर्माण करावे
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.