Ravikant Tupkar: रविकांत तुपकर यांच्यासह आंदोलकांना सीमेवरच रोखले

Buldana News: शेतकऱ्यांची कर्जमुक्ती, पीकविमा, सोयाबीन-कापूस उत्पादकांना भावफरक व इतर अनेक मागण्यांसाठी बुधवारी (ता. १९) मुंबईत आंदोलन करण्यासाठी निघालेले रविकांत तुपकर व क्रांतिकारी शेतकरी संघटनेच्या पदाधिकारी, कार्यकर्त्यांना खालापूर पोलिसांनी ताब्यात घेत आंदोलन रोखले. यानंतर तुपकर यांनी सरकारवर आंदोलन दडपल्याचा आरोप करीत यापेक्षाही राज्यभर आता मोठे आंदोलन उभारू, असा इशारा खालापूर पोलिस ठाण्यात माध्यमांशी बोलताना दिला.

पूर्वनियोजित कार्यक्रमानुसार सर्व आंदोलक मंगळवारी (ता. १८) मुंबईकडे निघाले होते. रात्री मुंबईच्या वेशीवर नढाळ गावात सर्वांनी मुक्काम केला. बुधवारी (ता. १९) सकाळी आंदोलनासाठी मुंबईकडे आंदोलक निघण्याच्या तयारीत असतानाच पोलिसांनी त्यांना अडवले. खालापूर (जि. रायगड) पोलिसांनी रविकांत तुपकर यांना अटक करीत ठाण्यात नेले. तर उर्वरित आंदोलकांना त्याच ठिकाणी स्थानबद्ध करून ठेवण्यात आले होते.

मंगळवारी मुंबईकडे निघालेले आंदोलक नढाळ गावात श्री क्षेत्र पंचायतन मंदिरात मुक्कामी असल्याची माहिती पोलिसांना मिळाली होती. मुक्कामाच्या ठिकाणी तगडा पोलिस बंदोबस्त लावण्यात आला. आंदोलक व पोलिसांत संघर्षाची स्थिती बनली. पोलिसांनी तुपकर यांना ताब्यात घेऊन मुक्कामाच्या ठिकाणावरून दुसरीकडे हलवले तर उर्वरित आंदोलकांना स्थानबद्ध केले.