Crop Insurance Protest : ‘पीकविम्या’साठी वीज टॉवरवर चढून आंदोलन

Amaravati News : पीकविमा कंपनीच्या कार्यालयात अनेक वेळा विचारणा केल्यावर कोणताही प्रतिसाद मिळत नसल्याचा आरोप करित राष्ट्रीय समाज पक्षाच्या पदाधिकाऱ्यांसह शेतकऱ्यानी गुरुवारी (ता. ११) थिलोरीनजीक असलेल्या हायपॉवर विद्युत टॉवरवर चढून आंदोलन केले.

मागील वर्षी शासनाने अमरावती जिल्ह्यासह दर्यापूर व काही भाग दुष्काळी जाहीर केले होते. या भागातील शेतकऱ्यांना पीकविम्याची रक्कम अदा करणे विमा कंपनीची जबाबदारी असताना अजूनही शेतकऱ्यांना भरपाई मिळाली नाही. त्यामुळे हे आंदोलन करण्यात आले. विशेष म्हणजे, आंदोलन सुरू झाल्याची माहिती प्रशासनाला असतानाही कोणतेही अधिकारी वा विमा कंपनीचे अधिकारी आंदोलनस्थळी पोहोचले नाहीत.

माहिती मिळताच दर्यापूर पोलिसांनी मात्र तातडीने बंदोबस्त लावला. २०२३-२४ करिता पीकविमा मंजूर झाला असून याबाबत कारवाई करावी, असे आदेश शासनाकडून असताना विमाकंपनी मात्र नेहमीप्रमाणे विमा रक्कम शेतकऱ्यांना देण्यास विलंब करीत असल्याचा आरोप या वेळी राष्ट्रीय समाज पक्षाचे जिल्हाध्यक्ष तसेच आंदोलनकर्ते किरण होले यांनी केला.

अकोला, यवतमाळ, बुलडाणा आदी जिल्ह्यांत वितरण झाले असून जाणूनबुजून अमरावती जिल्हा मागे ठेवण्यात आला आहे. आंदोलनस्थळी परिसरातील शेकडो शेतकरी जमले होते. हायपॉवर इलेक्ट्रिक टॉवर असल्याने यावरून खाली उतरावे, असा आग्रह पोलिसांच्या वतीने करण्यात आला.

मात्र, शेतकऱ्यांना पीकविमा रक्कम देणार असल्याचे लेखी आश्वासन विमा कंपनीच्या अधिकऱ्यांनी दिल्याशिवाय टॉवरवरून खाली उतरणार नसल्याचे आंदोलनकर्ते किरण होले यांनी सांगितल्याने प्रशासनाची तारांबळ उडाली होती. विमा कंपनी आणि कृषी विभागातील अधिकाऱ्यांनी फोन वरून आंदोलनकर्ते यांच्याशी संपर्क करून आंदोलन मागे घ्यावे, असा आग्रह केला.