Fodder Shortage : धुळे जिल्ह्यातील चारा, मुरघास अन्यत्र वाहतुकीस प्रतिबंध

Dhule News : जिल्ह्यात उत्पादित होणारा चारा, मुरघासाची कोणीही आगामी तीन महिन्यांपर्यंत इतर जिल्ह्यात वाहतूक करू नये, असा प्रतिबंधात्मक आदेश जिल्हा दंडाधिकारी तथा जिल्हाधिकारी अभिनव गोयल यांनी दिला आहे.

जिल्ह्यात १ एप्रिलपासून हिरवा व सुका असा मिळून सुमारे ३१ लाख ६९ हजार ४६६ टन चारा शिल्लक आहे. या संदर्भात जिल्हा पशुसंवर्धन उपायुक्तांच्या टिपणीची दखल घेत हा आदेश लागू करण्यात आला आहे.

जिल्हाधिकारी गोयल यांनी आदेशात म्हटले आहे, की भारतीय हवामान विभागाच्या अंदाजानुसार दक्षिण पॅसिफिक महासागरातील अल-निनो या समुद्र प्रवाहाच्या सक्रियतेमुळे देशातील मॉन्सून पर्जन्यावर विपरीत परिणाम होण्याची शक्यता आहे.

सद्यःस्थितीत जिल्ह्यात सरासरीपेक्षा कमी पर्जन्यमान झाल्याने जनावरांसाठी चाऱ्याच्या टंचाईची स्थिती गंभीर होण्याची शक्यता आहे.

जिल्हा पशुसंवर्धन उपायुक्तांच्या पत्रानुसार जिल्ह्यात गेल्या वर्षीच्या पेरणी अहवालानुसार १ एप्रिलपासून २६ लाख २८ हजार ६१२ टन हिरवा चारा, तर पाच लाख ४० हजार ८५४ टन वाळलेला चारा शिल्लक आहे. तो अंदाजे तीन ते चार महिने पुरेल.