Suryaghar Yojana : लातूर, धाराशिव जिल्ह्यात पाच हजार ग्राहकांच्या घरात ‘सूर्य’प्रकाश

Latur News : लातूर/धाराशिव : जिल्ह्यातील अनेक वीजग्राहक छतावरील सौरऊर्जाकडे वळू लागले असून, ते स्वतःच स्वतःची वीज तयार करत आहेत. प्रधानमंत्री मोफत सूर्यघर योजना सर्वसामान्य नागरिकांसाठी फलदायी ठरू लागली आहे. सूर्यघर योजनेच्या माध्यमातून जिल्ह्यातील तब्बल तीन हजार नऊशे तर धाराशिव जिल्ह्यातील एक हजार ५२ घरगुती वर्गवारीतील ग्राहक विजेबाबत स्वयंपूर्ण झाले आहेत.

महावितरणकडून लातूर जिल्ह्यात पंतप्रधान सूर्यघर योजनेची प्रभावी अंमलबजावणी केली जात आहे. या योजनेंतर्गत जिल्ह्यातील तब्बल ३ हजार ९०० ग्राहकांनी घराच्या छतावर सौरऊर्जेचे संच बसवले आहे. यामध्ये लातूर विभागातील २७८८, निलंगा २३२, तर उदगीर विभागातील ८८० वीजग्राहकांचा समावेश आहे.

२ हजार २४८५ ग्राहकांच्या छतावर सौर संच बसविण्याचे काम सुरू असून, लवकरच हे काम पूर्णत्वास येणार आहे. या वीजग्राहकांच्या छतावरील सौरऊर्जा प्रकल्पाची एकूण स्थापित क्षमता १५.४२ मेगावॅट इतकी आहे. धाराशिव जिल्ह्यातील एक हजार ५२ ग्राहकांनी घराच्या छतावर सौरऊर्जेचे संच बसवले आहे.

यामध्ये धाराशिव विभागातील ८४० तर तूळजापूर विभागातील २१२ वीजग्राहकांचा समावेश आहे. १ हजार १६३ ग्राहकांच्या छतावर सौर संच बसविण्याचे काम सुरू असून, लवकरच हे काम पूर्णत्वास येणार आहे. या वीजग्राहकांच्या छतावरील सौरऊर्जा प्रकल्पाची एकूण स्थापित क्षमता ३.८३ मेगावॅट इतकी आहे.

अशी आहे, सूर्यघर योजना
पंतप्रधानसूर्यघर मोफत वीज योजनेत घराच्या छतावर सौरऊर्जा प्रकल्प बसवून वीजनिर्मिती केली जाते. केंद्र सरकारकडून एक किलोवॅट क्षमतेच्या छतावरील सौर ऊर्जा निर्मिती प्रकल्पासाठी तीस हजार रुपये, दोन किलोवॅट क्षमतेसाठी साठ हजार रुपये तर तीन किलोवॅट किंवा त्यापेक्षा अधिक क्षमतेसाठी ७८ हजार रुपये थेट अनुदान मिळते.

या योजनेतील ग्राहकांना मोफत नेट मीटर देण्याचाही निर्णय महावितरणने घेतला आहे. योजनेचा लाभ घेण्यासाठी ग्राहकांना https://pmsuryaghar.gov.in या वेबसाईटवर नोंदणी करावी लागते. छतावरच्या सौरऊर्जा प्रकल्पात घराच्या गरजेपेक्षा अधिक वीज निर्माण झाल्याने वीजबिल शून्य होते.