Beed News : शेतकऱ्यांसमवेत कायम शेतात राब-राब राबणाऱ्या लाडक्या सर्जा-राजाचा अर्थात बैलांचा सण म्हणजे बैलपोळा अवघ्या दोन दिवसांवर येऊन ठेपला आहे. तत्पूर्वी बळीराजाने तयारी सुरू केली असून मोरक्या बाजारात खरेदीसाठी लगबग सुरू आहे. यंदा पाऊस काळ देखील चांगला असल्याने शेतकरी सुखावला असून पोळा सणाची जय्यत तयारी केली जात आहे.
वषार्नुवर्षे चालत आलेला बैलपोळा साजरा करण्याची परंपरा आजही कायम आहे. ग्रामीण भागात प्रत्येक गावात मोठ्या उत्साहात हा सण साजरा करून बैलांप्रति कृतज्ञता व्यक्त केली जाते. शेतकऱ्यांसाठी त्यांचे बैल वर्षभर शेतात राबतात. त्यामुळे बैलांच्या ऋणातून उतराई होण्यासाठी पोळ्याच्या दिवशी बैलाची रंगरंगोटी व सजावट करून पूजा केली जाते. यंदा बैलपोळा सोमवार(ता.२) रोजी आहे .
आपल्या पशुधनाला सजवण्यासाठी सजावटीचे साहित्य विक्री करणाऱ्या व्यावसायिकांनी आपली दुकाने थाटली आहेत. सर्जा-राजाला सजवण्यासाठी लागणारे इंगूळ, भोरकडी, पितळी शेंबी, चवरी, घुंगरू, कपाळ गोंडा, कवडी माळ, पैंजण, कासरा, वेसण गोंडे, बेगडी, म्होरकी, कासरा, चवरी आदी साहित्याने दुकाने सजली आहेत.
आपल्या लाडक्या सर्जा- राजाला सजवण्यासाठी येथील बाजारपेठेमध्ये शेतकऱ्यांनी गर्दी केली आहे. यंदा पाऊस देखील वेळेत आणि चांगला पडलेला आहे. त्यामुळे पोळा साजरा करण्यास शेतकऱ्यांमध्ये मोठा उत्साह दिसून येत आहे.
मातीच्या बैलजोडीला मोठी मागणी
पोळा सण साजरा करण्यासाठी घरोघरी मातीच्या बैलजोडीचे पूजन केले जाते. या मातीच्या बैलजोडीला मोठी मागणी असून, आकाराप्रमाणे शंभर ते दोनशे रुपये किंमत आहे, अशी माहिती सविता चित्रे यांनी दिली.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.