Organic Farming : विषमुक्त सेंद्रिय शेतीला प्राधान्य द्या

Pune News : ‘‘अन्नधान्याच्या आणि संकरित वाणांच्या तसेच इतर पिकांच्या अधिक उत्पादनासाठी रासायनिक खते, कीटकनाशके, बुरशीनाशके व तणनाशकांचा मोठ्या प्रमाणात वापर करण्यात येतो.

त्यामुळे पर्यावरणाचे संतुलन बिघडून जमिनीतील जैविक घटकांचा विनाश झाल्याने जमिनी मृतवत होत चालल्या आहेत. हा प्रकार रोखण्यासाठी पर्याय म्हणून विषमुक्त सेंद्रिय शेतीला प्राधान्य द्यावे.

यासंदर्भात सेंद्रिय शेतीसाठी कृषी खात्यामार्फत दिल्या जाणाऱ्या प्रशिक्षणांचा लाभ शेतकऱ्यांनी घ्यावा,’’ असे आवाहन आंबेगाव तालुका कृषी उत्पन्न बाजार समितीचे माजी सभापती प्रकाश घोलप यांनी केले. पोखरी (ता.आंबेगाव) येथे डॉ. पंजाबराव देशमुख नैसर्गिक शेती मिशन योजनेअंतर्गत सेंद्रिय गटांचा गावस्तरावर झालेल्या शेतकरी प्रशिक्षण कार्यक्रमात घोलप बोलत होते.

या वेळी मंडल कृषी अधिकारी रामचंद्र बारवे, सरपंच हनुमंत बेंढारी, कृषी पर्यवेक्षक श्री. डामसे, प्रकाश आंबेकर, कृषी साहाय्यक आर. के. विरणक, अरविंद मोहरे, ज्ञानेश्वर लोहकरे उपस्थित होते.

तालुका कृषी अधिकारी नरेंद्र वेताळ म्हणाले, ‘‘सद्यःस्थितीत उत्पादित होणाऱ्या अन्नधान्यावर रासायनिक खतांचा प्रभाव वाढत चालला आहे. त्यामुळे मानव व पशुपक्षी यांच्या आरोग्यावर विपरीत परिणाम होत आहेत. ही बाब चिंताजनक आहे.’’

नारायणगाव कृषी विज्ञान केंद्राचे मृदाविषय तज्ज्ञ योगेश यादव यांनी सेंद्रिय शेतीबाबत मार्गदर्शन केले. आत्मा समन्वयक धोंडिभाऊ पाबळे यांनी प्रास्ताविक व प्रगतिशील शेतकरी बाळासाहेब बेंढारी यांनी आभार केले.