Solapur Water Crisis : पावसाळ्याला सुरुवात; अजूनही १९ टँकर सुरू

Solapur News : गेल्या महिन्यात सतत १५ दिवसांहून अधिक काळ पडलेल्या मॉन्सूनपूर्व पावसामुळे गत आठवड्यात जिल्ह्यातील २७ टँकर बंद झाले. आता आठवडाभरात आणखी २३ टँकर बंद झाले आहेत. मे महिन्यातील शेवटच्या आठवड्याच्या सुरवातीला ६९ टँकरद्वारे टंचाईग्रस्त गावांना पाणीपुरवठा सुरू होता.

२८ मे रोजी ती संख्या ४२ पर्यंत घटली होती. मात्र, पावसाळ्याला सुरवात होऊनही बुधवार (ता. ४) पर्यंत १९ टँकरद्वारे टंचाईग्रस्त गावांना पाणीपुरवठा सुरू आहे. जिल्ह्यात यंदा मे महिन्यात ६९ टँकरद्वारे ५९ गावे व ५८७ वाड्या- वस्त्यांना पाणीपुरवठा सुरू होता. एक लाख ४५ हजार ९९० इतकी लोकसंख्या तर ६० हजार ९१६ जनावरे बाधित होती.

त्यांना पाणी पुरवण्यासाठी रोज १४९ खेपा मंजूर होत्या. मात्र, रोज १०४ पर्यंत खेपा होत होत्या. यंदा लवकरच १३ मेपासून जिल्ह्यात पूर्वमोसमी पावसाला सुरवात झाली. त्यानंतर सतत १७ दिवस पाऊस पडत राहिला. त्यामुळे बुधवारपर्यंत एकूण ५० टँकर बंद झाले आहेत. मात्र, अद्याप १९ टँकरद्वारे १९ टंचाईग्रस्त गावांना पाणीपुरवठा केला जात आहे.

तालुकानिहाय टँकर

सांगोला ३

मंगळवेढा ६

माढा १

करमाळा २

माळशिरस १

दक्षिण सोलापूर ४

उत्तर सोलापूर १

अक्कलकोट १

टंचाई स्थितीवर एक दृष्टिक्षेप

सुरू असलेले टँकर : १९

टंचाईग्रस्त गावे : ९

टंचाईग्रस्त वाड्या : १३१

बाधित लोकसंख्या : ५६,३३२

बाधित पशुधन : १२,५३५