Kharif Season Preparation : मॉन्सूनपूर्व पावसामुळे सांगलीत पूर्व मशागती सुरू

Sangli News : जिल्ह्यात दोन-तीन दिवसांपासून मॉन्सूनपूर्व पावसाने हजेरी लावली. त्यामुळे बळीराजा सुखावला असून खरीप हंगामाच्या पूर्व मशागती सुरू झाल्या आहेत. खरीप हंगामासाठी २८ हजार ५८१ क्विंटल बियाणे तर २ लाख २५ हजार ४८० टन खतांची मागणी केली असल्याची माहिती कृषी विभागाने दिली.

जिल्ह्यातील खरीप हंगामाचे सरासरी क्षेत्र २ लाख ५५ हजार ९८४ हेक्टर आहे. खरीप हंगामात बियाणे आणि खते यांची मागणी कृषी विभागाने करत तयारी पूर्ण केली आहे. दोन ते तीन दिवसांपासून जिल्ह्यातील विविध भागांत मॉन्सूनपूर्व पावसाने हजेरी लावली.

यामुळे शेतकरी सुखावला आहे. अनेक भागांत रात्री हलका पाऊस झाला. या पावसामुळे खरीप हंगामाच्या पेरणीसाठी पूर्व मशागती शेतकऱ्यांनी सुरू केल्या आहेत. अनेक भागांत पूर्व मशागतीही उरकल्या आहेत. समाधानकारक पाऊस सुरू झाल्यानंतर पूर्व मशागतींना गती येणार आहे.

जिल्ह्यात मॉन्सूनपूर्व पाऊस झाला असला तरी, समाधानकारक पाऊस झाला नाही. त्यामुळे आटपाडी, कवठेमहांकाळ, जत, खानापूर आणि तासगाव या दुष्काळी पट्ट्यासह शिराळा तालुक्यातील शेतकरी पावसाची प्रतीक्षा करू लागला आहे. जत तालुक्यात उडीद आणि तूर पिकांच्या पेरणीचे नियोजन शेतकरी करत आहेत.\

दरम्यान, कृषी विभागाने खरीप हंगामासाठी लागणाऱ्या बियाणे आणि खतांची मागणी केली आहे. यामध्ये बियाणे २८ हजार ५८१ क्विंटल तर २ लाख २५ हजार ४८० टन विविध खतांची मागणी केली आहे. सद्यःस्थितीला ८० हजार टन खते शिल्लक आहेत. हंगामात बियाणे आणि खतांची कमतरता भासणार नाही, याची दक्षता कृषी विभागाने घेतली आहे.

भात पेरणीसाठी शेतकऱ्यांची लगबग

शिराळा तालुक्यात पश्चिम व उत्तर भागात धूळवाफेवरील भात पिकाच्या पेरण्या होतात. तालुक्यात वळीव पावसाने हजेरी लावली होती. पडलेला पाऊस खरीपपूर्व पेरणीला लाभदायक ठरला. त्यानंतर पावसाने उघडीप दिल्याने सर्वत्र खरीपपूर्व मशागतीला गती आली आहे. रोहिणीचा मुहूर्त साधण्यासाठी शेतकऱ्यांनी नियोजन सुरू केले आहे.

बियाणे मागणी (क्विंटलमध्ये)

सोयाबीन ९,८००

भात २,५७३

खरीप ज्वारी ३,१२०

बाजरी २,१६०

मका ८,५२०

तूर ३३६

मुग १३७

उडीद ६३८

भुईमूग १,२७६

सूर्यफूल २१

एकूण २८,५८१