Monsoon 2025: मॉन्सूनपूर्व पावसाने धाराशिवला मोठे नुकसान

Dharashiv News: धाराशिव जिल्ह्यात मेच्या दुसऱ्या आठवड्यापासूनच मॉन्सूनपूर्व पावसाने हाहाकार माजवला. पंधरा दिवसांपासून सलग होत असलेल्या पावसामुळे शेती, फळबागा, जनावरे, घरे आणि इतर मालमत्तेचेही मोठे नुकसान झाले आहे. वीज पडून दोन जण दगावले असून आजवर ३६ जनावरे दगावली आहेत.

या पार्श्‍वभूमीवर आमदार राणाजगजितसिंह पाटील यांनी तुळजापूर व धाराशिव तालुक्यातील बाधित शेतकऱ्यांच्या बांधावर जाऊन नुकसानीची प्रत्यक्ष माहिती घेतली. नुकसानीचे तातडीने पंचनामे पूर्ण करून मदतीसाठी अहवाल सरकारला सादर करण्याचे आदेश त्यांनी अधिकाऱ्यांना दिले.

पंधरा दिवसांपासून वादळी वाऱ्यासह झालेल्या मुसळधार पावसामुळे शेती आणि शेतकऱ्यांचे मोठे आर्थिक नुकसान झाले आहे. जिल्ह्यातील अनेक भागांत विजा कोसळून पशुधनही दगावले आहे. अनेक ठिकाणी कांदा, पपई, द्राक्ष, कोथिंबीर आणि टरबूज यांसारख्या पिकांचे अतोनात नुकसान झाले आहे.

आमदार राणाजगजितसिंह पाटील यांनी मसला (खुर्द), लासोना (धाराशिव) परिसरातील बाळूदेव कुलकर्णी, लक्ष्मीकांत कदम, नरसिंग कुंभार, विलास नाईकनवरे, सुभाष नाईकनवरे, उमेश साळुंके या शेतकऱ्यांच्या बांधावर जाऊन नुकसानीची माहिती घेतली. सततच्या पावसाने शेतकऱ्यांचे मोठे नुकसान झाले आहे.

एकही बाधित शेतकरी मदतीपासून वंचित राहता कामा नये, यासाठी आपण स्वतः शासनदरबारी पाठपुरावा करत आहोत, अशी माहिती आमदार पाटील यांनी दिली. दत्ताभाऊ कुलकर्णी, सतीश दंडनाईक, संतोष बोबडे, महादेव जाधव, आनंद कंदले, दयानंद शिंदे, दिनेश बागल, सुदर्शन जाधव, उद्धव पाटील, गुरुलिंग स्वामी, नागनाथ पवार,

संजय स्वामी, ज्ञानेश्वर जंगाले, निळकंठ पाटील यांच्यासह महसूल व कृषी विभागाचे अधिकारी व शेतकरी उपस्थित होते. नुकसानग्रस्त शेतकऱ्यांनी महसूल व कृषी विभागाशी संपर्क साधून पंचनामे करून घ्यावेत, असे आवाहनही आमदार पाटील यांनी केले.