Electricity Theft : छत्रपती संभाजीनगर परिमंडलात वर्षभरात वीज चोरीची ४४२५ प्रकरणे उघड

Chh. Sambhajinagar News : महावितरणच्या छत्रपती संभाजीनगर परिमंडलात गेल्या वर्षभरात वीज चोरीची ४४२५ प्रकरणे उघडकीस आली. यात ग्राहकांनी ७ कोटी ८७ लाख रुपयांची वीज चोरी केल्याचे आढळून आले आहे. या सर्वांवर दंडात्मक कारवाई करण्यात आली असून ३५० प्रकरणांत वीज चोरी करणाऱ्यांवर पोलिसांत गुन्हे दाखल करण्यात आल्याचे महावितरणने कळविले आहे.

छत्रपती संभाजीनगर व जालना या दोन्ही जिल्ह्यांत वीज चोरीविरोधात नियमित कारवायांबरोबरच प्रत्येक महिन्यात विशेष मोहीम राबविण्याचे आदेश सर्व क्षेत्रीय अभियंते व कर्मचाऱ्यांना आहेत. ज्या विद्युत वाहिनीवर वीजगळतीचे प्रमाण अधिक आहे, त्या भागात इतर भागांतील कर्मचाऱ्यांनीही भाग घेऊन एकाचवेळी कारवाई करण्याचे निर्देशही आहेत. त्यानुसार परिमंडलातील प्रत्येक शाखेत प्रत्येक महिन्याच्या पहिल्या किंवा दुसऱ्या आठवड्यात सलग काही दिवस केवळ वीज चोरीविरोधातील धडक मोहीम राबविण्यात येत आहे.

वीजचोरी कळवा, बक्षीस मिळवा!

वीजचोरीची माहिती देणाऱ्यांना महावितरणच्या वतीने वीजचोरीची माहिती देणाऱ्यांना रोख रक्कम बक्षीस म्हणून देण्यात येते.वीजचोरीची माहिती देणाऱ्यांना वीजचोरीच्या निर्धारित रकमेच्या दहा टक्के रक्कम बक्षीस म्हणून देण्यात येते.

वीजचोरी करणाऱ्या ग्राहकाने तडजोड रकमेसह वीजचोरीची संपूर्ण रक्कम भरल्यानंतरच बक्षीस देण्यात येते. वीजचोरीची माहिती बंद पाकिटात लेखी स्वरूपात समक्ष कार्यकारी अभियंता यांना देऊन त्यांची पोच नागरिकांनी घ्यावी. माहिती देणाऱ्याचे नाव गुप्त ठेवण्यात येते.

मंडलनिहाय विजचोरीची प्रकरणे

छत्रपती संभाजीनगर परिमंडलात एप्रिल-२०२४ ते मार्च-२०२५ या आर्थिक वर्षात छत्रपती संभाजीनगर शहर मंडलात ६५९, छत्रपती संभाजीनगर ग्रामीण मंडलात २७३४ तर जालना मंडलात वीजचोरीची १०३२ प्रकरणे उघडकीस आली. एकूण ४४२५ प्रकरणांत ग्राहकांना ७ कोटी ८७ लाख रुपयांच्या वीजचोरीची बिले देण्यात आली.

ज्या ग्राहकांनी वीजचोरीची बिले भरलेली नाहीत, त्यांच्यावर पोलिसांत गुन्हे दाखल करण्याची प्रक्रिया महावितरणतर्फे सुरू करण्यात आली आहे. आतापर्यंत छत्रपती संभाजीनगर शहर मंडलात २, छत्रपती संभाजीनगर ग्रामीण मंडलात १६६ तर जालना मंडलात १८२ प्रकरणांत वीजचोरांवर पोलिस ठाण्यांत गुन्हे नोंदवण्यात आल्याचे महावितरणाने कळविले आहे.