Poultry Industry: कुक्‍कुट समन्वय समितीचा पशुसंवर्धन मंत्र्यांना विसर

Nagpur News: पोल्ट्री व्यावसायिकांच्या समस्यांची सोडवणूक करण्यासाठी तत्कालीन पशुसंवर्धन व दुग्धविकासमंत्री राधाकृष्ण विखे पाटील यांनी राज्यस्तरीय कुक्‍कुट समन्वय समितीचे गठण केले होते. परंतु या खात्याचा प्रभार सांभाळण्यास काही महिन्यांचा कालावधी लोटला असतानाही पंकजा मुंडे यांनी मात्र समिती सदस्यांची साधी ओळखही करून घेतली नसल्याचा आरोप आहे.

महाराष्ट्र शेतीपूरक व्यवसाय म्हणून पोल्ट्री व्यवसाय करणाऱ्यांची संख्या ९ लाखांवर आहे. या क्षेत्रात आलेल्या नैराश्‍यातून राज्यात पोल्ट्री व्यावसायिकांच्या आत्महत्येचे प्रकारही घडले होते. त्याची दखल घेत तत्कालिन पशुसंवर्धन व दुग्ध विकासमंत्री राधाकृष्ण विखे पाटील यांनी राज्यस्तरीय समन्वय समितीचे गठन केले. या माध्यमातून पोल्ट्री व्यावसायिकांच्या समस्या ऐकत त्या सोडविण्याचा प्रयत्न होणार होता.

या समितीचे पदसिद्ध अध्यक्षपद पशुसंवर्धन आयुक्‍तांकडे होते. सुरुवातीच्या काळात राधाकृष्ण विखे पाटील यांनी समितीच्या बैठकांना हजेरी लावत पोल्ट्री व्यावसायिकांच्या समस्या जाणून घेतल्या. यातील पोल्ट्री खाद्याच्या बॅगवर घटकांची नोंद, पोल्ट्री व्यवसाय क्षेत्रात सोलरचा वापर, त्याबरोबरच पोल्ट्रीचा कृषिमध्ये समावेश या मागण्यांच्या पूर्ततेसाठी पुढाकार घेण्यात आला. पशुसंवर्धन आयुक्‍तदेखील या मागण्या मंजूर व्हाव्या यासाठी प्रयत्नशील होते.

परंतु नव्या सरकारमध्ये पशुसंवर्धन व दुग्धविकास मंत्रालयाची जबाबदारी पंकजा मुंडे यांच्यावर आली. त्यांनी मात्र या समितीकडे सोईस्करपणे दुर्लक्ष केल्याचा आरोप आहे. पंकजा मुंडे यांना या खात्याचा पदभार स्वीकारत सहा महिन्यांपेक्षा अधिकचा कालावधी लोटला आहे. परंतु आजवर त्यांनी समितीची एकही बैठक घेतली नाही. अद्याप त्यांना या समितीमधील सदस्यांची साधी ओळखही नसल्याचे सांगितले जाते. त्यामुळे राज्यात रोजगार निर्मितीचे मोठे क्षेत्र असलेल्या या उद्योगातील समस्यांची सोडवणूक कधी आणि कशी होईल, असा प्रश्‍न उपस्थित केला जात आहे.