Gram Panchayat Election : सांगली जिल्ह्यातील ३४९ गावांच्या कारभारी होणार महिला

Sangli News : जिल्ह्यातील ६९६ ग्रामपंचायतींच्या सरपंचपदाचे आरक्षण बुधवार (ता. २३) जाहीर करण्यात आले. त्यापैकी ३४९ गावांत महिलांना संधी मिळाली आहे. जिल्ह्यातील सर्व तालुक्यांतील प्रमुख गावांमध्ये सर्वसाधारण प्रवर्गासाठी आरक्षण पडल्याने चुरशीच्या लढती होण्याची शक्यता आहे. आता ग्रामीण राजकीय आखाडा तापणार आहे.

ग्रामपंचायर्तीच्या आगामी निवडणुकांसाठी सरपंचपदाची आरक्षण सोडत काढण्यात आल्याने ग्रामीण भागातील पुढाऱ्यांमध्ये उत्साहाचे वातावरण दिसत आहे. दरम्यान, काही ठिकाणी अपेक्षित असलेले आरक्षण न निघाल्याने इच्छुकांचा हिरमोड झाला, तर अनेक ठिकाणी अपेक्षित आरक्षण निघाल्याने इच्छुकांमध्ये उत्साह संचारला. सोडतीनंतर गावोगावी आरक्षणाची चर्चा सुरू झाली आहे. सोडतीनंतर आता गावोगावचे वातावरण तापणार आहे.

दरम्यान, काही ठिकाणी कार्यकर्त्यांनी आरक्षणाला आक्षेप नोंदवला, परंतु अधिकाऱ्यांनी त्यांचे जागेवरच समाधान केले. त्यामुळे जिल्ह्यात कुठेही कायदा व सुव्यवस्थेचा प्रश्न निर्माण झालेला नाही. समाज माध्यमांवरही आरक्षणाचे अपडेट शेअर केले जात होते. त्यामुळे ‘नेटिजन्स ॲक्टिव्ह’ असल्याचे दिसून आले

मिरज तालुक्यात माधवनगर, बुधगाव, बेडग, बिसूर. जत तालुक्यात संख, उमदी. कडेगाव तालुक्यातील चिंचणी, रामापूर. तासगाव तालुक्यात कवठेएकंद, सावळज, आरवडे, बोरगाव. पलूस तालुक्यातील भिलवडी, रामानंदनगर, वसगडे, बांबवडे, कुंडल. शिराळा तालुक्यातील माळेवाडी, बिऊर, कोकरुड, शिरसी. वाळवा तालुक्यातील जुनेखेड, कापूसखेड, रेठरेधरण, शिरटे, ओझर्डे, कामेरी. खानापूर तालुक्यातील नागेवाडी, गोरेवाडी येथे इच्छुकांना धक्का बसला आहे.

या ग्रामपंचायती ठरतात लक्षवेधी

या मोठ्या ग्रामपंचायती असून सर्वसाधारण गटासाठी सरपंचपद आहे. यामध्ये आटपाडी तालुक्यातील सहा, खानापूर तालुक्यातील सहा, वाळवा तालुक्यातील नऊ, कडेगाव तालुक्यातील चार, शिराळा तालुक्यातील चार, कवठेमहांकाळ तालुक्यातील पाच, हिंगणगाव, तिसंगी, शिरढोण, नांगोळे, बोरगाव, तासगाव तालुक्यातील दोन गावे अशा ठिकाणी लक्षवेधी निवडणूक होणार आहे.