PM Kisan : कोल्हापूर जिल्ह्यात अद्यापही ३८ हजार शेतकरी पीएम किसानपासून वंचीत

PM Kisan E Kyc : देशभरात पीएम किसान अंतर्गत कोट्यावधी शेतकऱ्यांना वर्षभरात ३ हफ्त्यात ६ हजार रुपये मिळतात. दरम्यान सध्या केंद्र सरकारने पीएम किसान लाभार्थ्यांना केवायसी पूर्ण करण्याचे आवाहन केले आहे. ज्या लाभार्थ्यांनी केवायसी पूर्ण केली नाही त्यांनी लाभ मिळणार नसल्याने देशभरात याबाबत मोहीम राबवली जात आहे. दरम्यान महाराष्ट्रातील कोल्हापूर जिल्ह्यातील शेतकऱ्यांनी जवळपास ९२ टक्के केवायसी पूर्ण केल्याची माहिती समोर आली आहे.

जिल्ह्यात सध्या ९२ टक्के केवायसी पूर्ण झाली आहे परंतु अद्याप जिल्ह्यातील १२९२ गावांत ३८ हजार २८८ शेतकरी लाभार्थ्यांची ई-केवायसी झालेली नाही. यामुळे अनेक शेतकरी लाभार्थी पात्र आहेत. मात्र, खाते इनअॅक्टिव्ह व बंद असणे, आधार लिंक नसणे यामुळे लाभ मिळत नसल्याची बाब समोर येत आहे.

ज्या शेतकऱ्यांनी ई केवायसी पूर्ण केली नाही त्यांना ही प्रक्रिया अपडेट करावी लागणार आहे. शेतकऱ्यांच्या खात्यात आतापर्यंत १५ हफ्ते जमा झाले आहेत तर १६ वा हफ्ता लोकसभा निवडणुकीच्या आचारसंहितेपूर्वी मिळण्याची शक्यता बोलली जात आहे.

जिल्ह्यात ४ लाख ८९ हजार योजनेचे पात्र लाभार्थी आहेत. यापैकी ४ लाख ५१ हजार लाभार्थी यांची ई-केवायसी पूर्ण झाली आहे. प्रत्येक गावात सुमारे ३० ते ४० लाभार्थी राहिले असून फक्त ८ टक्के राहिले, अशी माहिती कृषी खात्याने दिली. काही दिवसांपूर्वी पंधरावा हप्ता केंद्र शासनाच्यावतीने देण्यात आला.

सर्व पात्र शेतकरी कुटुंबांना दर चार महिन्यांनी २००० रुपयांच्या तीन समान हप्त्यांमध्ये प्रतिवर्ष ६००० रुपयांची मदत दिली जाते. योजनेनुसार पती, पत्नी आणि अल्पवयीन मुलांची गणना शेतकरी कुटुंबात केली जाते. यात २००० रुपये थेट शेतकरी / शेतकरी कुटुंबाच्या बँक खात्यात जमा केले लाभार्थी होते.

यामध्ये केंद्र शासनाच्या नियमात न बसलेले शेतकरी दरवर्षी कमी होत आहेत. या अट शिथील कराव्या, अशी मागणी शेतकऱ्यांतून होत आहे. दरम्यान, करवीर तालुक्यात सुमारे एक हजार वारसा खातेदार शेतकऱ्यांच्या प्रस्तावावर काम सुरू असल्याचे कृषी खात्यातील सूत्रांकडून सांगण्यात आले.

याबाबत प्रभारी जिल्हा कृषी अधिक्षक अरूण भिंगारदिवे म्हणाले की, आम्ही शेतकऱ्यांशी संपर्क साधून आधार लिंक करून घेत आहे. लाभार्थी वंचित राहणार नाही, याची दक्षता कृषी खाते घेतोयहे. तसेच ई केवायसी करण्यासाठी महा ई-सेवा केंद्रावरही सूचना करण्यात आल्याचे ते म्हणाले.