Mulberry Cultivation : रत्नागिरीत तुती लागवडीचा पथदर्शी प्रकल्प

Ratnagiri News : महात्मा गांधी रोजगार हमी योजनेअंतर्गत (मनरेगा) रेशीम उद्योग विकास योजनेतून रेशीम शेतीला चालना दिली जाणार आहे. या योजनेची रत्नागिरी जिल्ह्यात प्रभावी अंमलबजावणीसाठी जिल्हा परिषदेने पावले उचलली आहेत. प्रत्येक तालुक्यात १० एकरप्रमाणे ९० एकर क्षेत्रावर तुती लागवडीचा पथदर्शी प्रकल्प केला जाणार आहे. त्यासाठी पावणेचार कोटींचा आराखडा करण्याच्या हालचाली सुरू आहेत.

रेशीम संचालनालयासह कृषी विभाग आणि पंचायत समिती यांच्यामार्फत रेशीम उद्योग योजना राज्यभरात प्रभावीपणे राबविण्याचा निर्णय शासनातर्फे घेण्यात आला आहे. कमी खर्चात जादा उत्पन्न मिळवून देणाऱ्या तुती लागवड आणि रेशीम शेतीला प्रोत्साहन देण्यासाठी शासनाने पुढील पाच वर्षांसाठी राज्यात सुमारे १ लाख हेक्टर क्षेत्राचे उद्दीष्ट ठेवले आहे.

त्यासाठी मनरेगातून शेतकऱ्यांना एकरी २ लाख १८ हजार व संगोपन वा शेडसाठी १ लाख ७९ हजार असे मिळून ३ लाख ९७ हजार रुपयांचे अनुदान दिले जाणार आहे. या योजनेच्या पात्रतेसाठी शेतकऱ्याकडे कमीतकमी एक एकर तर, जास्तीत जास्त ५ एकर क्षेत्र अपेक्षित आहे. रत्नागिरी जिल्हा परिषद मुख्य कार्यकारी अधिकारी किर्तीकिरण पुजार यांच्या मार्गदर्शनाखाली ही योजना नऊ तालुक्यांत राबवली जाणार आहे.

त्यासाठी कृषी विभाग, पंचायत समितीतर्फे प्रत्येक तालुक्यात कार्यशाळा सुरू झाल्या आहेत. प्रत्येक तालुक्यासाठी १० एकर क्षेत्राचे उद्दीष्ट ठेवण्यात आले आहे. नऊ तालुक्यांतून सुमारे ९० एकर क्षेत्रावर तुती लागवड होणार आहे. सुमारे पावणेचार कोटींचा आराखडा ‘मनरेगा’मधून तयार केला जाणार आहे.

राजापूर तालुक्यात तुती लागवडीच प्रयोग यशस्वी झाला आहे. येथील माजी सैनिक वासुदेव घाग, राजाराम पाटेकर, सुधीर पालकर, हनुमंत विचारे आणि अमर खामकर या शेतकऱ्यांनी तुतीची लागवड केली. त्यांनी सुमारे दोनशेहून अधिक अंडीपुंज आणि दीडशेहून अधिक कोषनिर्मिती केली. त्यामध्ये गोठणेदोनिवडे येथील युवा शेतकरी हनुमंत विचारे यांनी तब्बल २० अंडी पुंज मागे ४८० काऊंट असलेल्या ए ग्रेडची २२ किलो कोषनिर्मिती केली आहे.