Akola Bribery Case : नायब तहसीलदार बळीराम चव्हाण लाचप्रकरणात अटकेत

Akola News : पातूर तहसील कार्यालयातील नायब तहसीलदार बळीराम चव्हाण यांना गुरुवारी (ता. १९) सायंकाळी अकोला लाचलुचपत प्रतिबंधक विभागाच्या (एसीबी) पथकाने लाच मागितल्याप्रकरणी अटक केली. या कारवाईमुळे महसूल विभागात खळबळ उडाली आहे.

तालुक्यातील एका शेतकऱ्याने आपल्या शेतातील कायम खुणा करून देण्यासाठी नायब तहसीलदार चव्हाण यांच्याकडे विनंती केली होती. या कामासाठी त्याला चव्हाण यांच्यामार्फत चार हजार रुपयांच्या लाचेची मागणी केली होती.

तक्रारदार हा अल्पभूधारक असून, हलाखीच्या परिस्थितीत शेतमजुरी करीत आपल्या कुटुंबाचा उदरनिर्वाह चालवतो. तक्रारीची प्राथमिक पडताळणी केल्यानंतर अधिकाऱ्यांना त्यामध्ये तथ्य आढळून आले. त्यानुसार गुरुवारी सापळा रचण्यात आला होता.

मात्र, लाच स्वीकारताना चव्हाण याला संशय आला आणि त्याने रक्कम स्वीकारण्यास नकार दिला. तरीसुद्धा लाच मागणीचे पुरावे भक्कम असल्याने त्यास ताब्यात घेण्यात आले. दरम्यान, या प्रकरणात अजून एक जणाचा समावेश असून तो सध्या फरारी आहे.

ही कारवाई लाचलुचपत प्रतिबंधक विभागाचे उपअधीक्षक मिलिंद बहाकर यांच्या नेतृत्वाखाली पोलीस अंमलदार दिगंबर जाधव, राहुल इंगळे, अभय बावस्कर, संदीप तळे, किशोर पवार, नीलेश शेगोकार, असलम शहा व चालक नफीस यांनी केली.