Monsoon Rainfall : बारा पैकी ६ वर्षे कमी, तर ६ वर्षे जास्त पावसाची

Parbhani News : जिल्ह्याचे जून ते ऑक्टोबर या कालावधीतील पर्जन्यमानाची सरासरी ८३८.९० मिलिमीटर आहे. या कालावधीत जिल्ह्यात २०१३ ते २०२४ या १२ पैकी ६ वर्षे ही सरासरीपेक्षा कमी तर ६ वर्षे सरासरीपेक्षा जास्त पावसाची राहिली आहेत.

२०२४ मध्ये जून ते ऑक्टोबरपर्यंत ८३८.९ मिमी अपेक्षित असताना प्रत्यक्षात ८६८.९ मिलिमीटर (१०३.५८ टक्के) पाऊस झाला. तर मॉन्सून कालावधीत जून ते सप्टेंबरपर्यंत ७६१.३ मिमी अपेक्षित असतांना प्रत्यक्षात ८२७.४ मिमी (१०८.७ टक्के) पाऊस झाला.

१ जून ते ३० सप्टेंबर हा कालावधी पडणाऱ्या पावसाला नैऋत्य मोसमी (मॉन्सून) पाऊस म्हटले जाते.१ ऑक्टोंबर ते ३१ डिसेंबर पर्यंत पडणाऱ्या पावसाला मॉन्सूनोत्तर पाऊस म्हटले जाते.१ जानेवारी ते २८-२९ फेब्रुवारी हिवाळी पाऊस असतो तर १ मार्च ३१ मे पूर्वमोसमी पाऊस असतो.

कृषी विभागाकडून जून ते ऑक्टोंबर या कालावधीतील पर्जन्यमानाची आकडेवारी संकलित केली जाते.२०१९ पर्यंत परभणी जिल्ह्याची जून ते ऑक्टोंबर या कालावधीतील पर्जन्यमान सरासरी ७७४.५९ मिलिमीटर होती.मे २०२० मधील शासन निर्णयानुसार वार्षिक सरासरी मध्ये सुधारणा करण्यात आली आहे.

त्यानुसार परभणी जिल्ह्याची जानेवारी ते डिसेंबर या कालावधीतील पावसाची सरासरी ९३०.३० मिमी आहे.जून ते ऑक्टोंबर या कालावधीतील सरासरी ८३८.९० मिमी आहे.मोसमी पावसाच्या कालावधीतील जून ते सप्टेंबर महिन्यातील पावसाची सरासरी ७६१.३ मिलिमीटर आहे.

१२ पैकी ६वर्षे कमी पावसाचे

जून ते ऑक्टोंबर या कालावधीत २०१४,२०१५ २०१७,२०१८,२०२२,२०२३ या ६ वर्षात सरासरीपेक्षा कमी पाऊस झाला.तर २०१३,२०१६,२०१९,२०२०,२०२१,२०२४ या ६ वर्षात सरासरीपेक्षा जास्त पाऊस झाला.

त्यात २०२१ मध्ये सर्वाधिक ११९६.४० मिलिमीटर (१४२.६१ टक्के) म्हणजेच तुलनेत ३५७.४ मिलिमीटर एवढा जास्त पाऊस झाला होता.त्यानंतर २०२२ व २०२३ वर्षी सरासरीपेक्षा कमी पाऊस झाला.जिरायती बहुल क्षेत्र असलेल्या परभणी जिल्ह्यात शेतकऱ्यांच्या अर्थकारणावर पावसाचे आगमन-निर्गमन,असमान वितरण,प्रदीर्घ खंड,अतिवृष्टी यामुळे परिणाम होत आहेत.