VNMKV Parbhani : शेतकऱ्यांच्या प्रगतीसाठी विद्यापीठांनी भरीव कार्य करावे

Parbhani News : हवामान बदलाच्या स्थितीत शेतीतील उत्पन्नाची जोखीम कमी करून खात्रीशीर उत्पन्नासाठी शेतकऱ्यांनी रेशीम शेती केली पाहिजे. त्याअनुषंगाने तुती लागवड क्षेत्र वाढीसाठी प्रयत्न करावेत. शेतकऱ्यांच्या आर्थिक प्रगतीसाठी कृषी विद्यापीठाने भरीव कार्य करण्याची गरज आहे.

शास्त्रज्ञांनी शेतकरी दत्तक घ्यावेत. कृषी मेळाव्यांतील महिला शेतकऱ्यांचा सहभाग वाढण्यासाठी प्रयत्न केले पाहिजेत, असे प्रतिपादन पालकमंत्री मेघना साकोरे-बोर्डीकर यांनी रविवारी (ता. १८) येथे केले.

वसंतराव नाईक मराठवाडा कृषी विद्यापीठाच्या ५३ व्या वर्धापनदिनी रविवारी (ता. १८) विस्‍तार शिक्षण संचालनालय आणि कृषी विभाग यांच्यातर्फे आयोजित खरीप पीक परिसंवाद व कृषी प्रदर्शनाचे उद्‍घाटन पालकमंत्री मेघना साकोरे-बोर्डीकर यांनी केले.

अध्यक्षस्थानी कुलगुरू डॉ. इंद्र मणी मिश्रा होते. भारतीय किसान संघाचे महाराष्ट्र, गुजरात, गोवा राज्याचे प्रांत संघटन मंत्री दादा लाड, माजी कृषी आयुक्त उमाकांत दांगट, कार्यकारी परिषद सदस्य दिलीप देशमुख, भागवत देवसरकर, संशोधन संचालक डॉ. खिजर बेग, शिक्षण संचालक डॉ. भगवान आसेवार, विस्तार शिक्षण संचालक डॉ. राकेश अहिरे, कृषी सहसंचालक प्रकाश देशमुख (छत्रपती संभाजीनगर), जिल्हा अधीक्षक कृषी अधिकारी दौलत चव्हाण, कुलसचिव संतोष वेणीकर, प्रगतीशील शेतकरी चंद्रकांत देशमुख, सुधीर अग्रवाल, अनंत चोंदे आदी उपस्थित होते.

पालकमंत्री मेघना साकोरे-बोर्डीकर म्हणाल्या, की जिल्ह्यात १०० सूक्ष्म व मध्यम उद्योग उभारणीसाठी प्रयत्न सुरू आहेत. या उद्योगांसाठी आवश्यक कच्चामाल पुरविण्यासाठी शेतकऱ्यांची गरज आहे. परभणी जिल्ह्याची फुड प्रोसिंग हब म्हणून ओळख निर्माण करणार आहोत. रेशीम धागा निर्मिती केंद्र सुरू करण्यासाठी प्रयत्न सुरु आहेत.

यंदाचे २०२५ हे वर्षे महिला शेतकरी वर्षे म्हणून साजरे करण्याचा मानस आहे. दांगट म्हणाले, की हवामान बदल व जागतिक तापमान वाढ यामुळे शेतीक्षेत्रात आव्हाने निर्माण झाली आहेत. कृषी विद्यापीठामधून दर्जेदार शिक्षण मिळाले पाहिजे. रिक्त पदे भरण्याच्या कामी पालकमंत्री बोर्डीकर यांनी लक्ष घालावे. डॉ. इंद्र मणी म्हणाले, की शेतकरी-शास्त्रज्ञांच्या प्रयत्नांमुळे देश अन्नधान्यांत स्वंयपूर्ण झाला. राष्ट्राची सुरक्षा आणि अन्नसुरक्षा महत्त्वाची आहे.

प्रगतिशील शेतकऱ्यांचा सन्मान...

वरपुड (जि. परभणी) येथील प्रगतिशील शेतकरी चंद्रकांत देशमुख यांचा २०२५ मधील मार्गदर्शक शेतकरी पुरस्कार देऊन सन्मान करण्यात आला. युवा शेतकरी २०२५ पुरस्काराने सन्मानित शेतकऱ्यांमध्ये ज्ञानेश्‍वर देशमाने (मंगरूळ, जि. परभणी), वैशाली घुगे (अणदूर, जि. धाराशिव), राहुल कव्हर (ताकतोडा, जि. हिंगोली), जयकिशन शिंदे (वरोडी, जि. जालना), रवि दाभाडे (मण्यारवाडी, जि. बीड), जनार्दन सूर्यवंशी (शिरूरअनंतपाळ, जि. लातूर), प्रसाद इंगोले (मालेगाव, जि. नांदेड), योगकुमार श्रीखंडे (कायगाव, जि. छत्रपतीसंभाजीनगर) परिसंवादात सोयाबीन, तूर, कापूस, ज्वारी, बाजरी, कडधान्ये, भरडधान्यांचे महत्त्व, कीड व रोग व्यवस्थापनावर शास्त्रज्ञ माहिती दिली. दरम्यान सकाळी खरीप बियाणे विक्रीचा प्रारंभ मान्यवरांच्या हस्ते झाला.