NAINA Protest : नैनाविरोधी आंदोलनामुळे पनवेलमध्ये संघर्षाची चिन्हे

Panvel News : नैनाविरोधात उपोषणाचा मंगळवारी सातवा दिवस होता, मात्र प्रशासनाकडून अद्याप कुठल्याही प्रकारचे ठोस आश्वासन न मिळाल्‍याने प्रकल्पग्रस्तांमधून संताप व्यक्‍त होत आहे. उपोषणकर्ते अनिल नामदेव ढवळे, दमयंती नामदेव भगत, मधुकर महादेव पाटील, समीर पांडुरंग पारधी यांची प्रकृती ढासळत आहे. त्यामुळे प्रकल्पग्रस्त आक्रमक झाले असून मोठा संघर्ष होण्याची चिन्हे आहेत.

नैनाविरोधी आंदोलनात सोमवारी (ता. ११) शेकडो प्रकल्पग्रस्त महिला एकत्र आल्या होत्या. नैना हटवल्याशिवाय राहणार नाही, अशी भूमिका घेत त्‍यांनी आत्मदहनाचा इशारा दिल्‍याने उपोषण स्थळाला पोलिस छावणीचे स्वरूप आले होते.

प्रकल्पग्रस्त महिला ज्योती जनार्दन चोरघे यांनी थेट मुख्यमंत्री एकनाथ शिंदे यांना पत्र लिहिल्‍याने वातावरण आणखी तापले होते. कुठला अनुचित प्रकार घडू नये म्हणून दहा ते बारा पोलिस वाहने, सहायक आयुक्तासह पनवेलमधील सर्वच पोलिस ठाण्याचे वरिष्ठ निरीक्षक व कर्मचारी मोठ्या संख्येने तैनात होते.

दरम्यान सिडको मंडळाच्या अधिकाऱ्यांनी आंदोलकांशी चर्चा करून २३ डिसेंबरनंतर या संदर्भात बैठक घेवू असे सांगितले आहे. तर आंदोलकांना दिलासा मिळावा, यासाठी शेतकऱ्यांचे एक शिष्टमंडळ मंगळवारी नागपूर अधिवेशनाच्या ठिकाणी रवाना झाले आहेत. विरोधी पक्षनेत्यांना भेटून नैनाविरोधी भूमिका मांडणार असल्‍याचे सांगण्यात आले.

उपोषणबाबत आमदार महेश बालदी म्‍हणाले, उपोषण सुरू असलेल्या लोकांकडे कोणीही फिरकणार नाही. त्यांना चर्चेला बोलावतील, असेही वाटत नाही. सकाळी खाऊन जायचे दोन तास बसायचे, पुन्हा दुपारी जेवायेच असे सुरू आहे. हे सर्व काही ढोंग असल्‍याची टीका त्‍यांनी केली.