Canal Water Protest : पालखेडच्या पाण्यासाठी अर्धनग्न आंदोलन

Nashik News : हक्काचे पालखेड डाव्या कालव्याचे पाणी मिळत नसल्याने मंगळवारी (ता.८) देशमाने बुद्रुक व देशमाने खुर्द येथील दोन पाणीवापर सहकारी संस्थांच्या शेतकऱ्यांनी आक्रमक होत थेट पालखेड कालव्यात उतरून अर्धनग्न होत जलसमाधी आंदोलन केले. पालखेड प्रशासनाच्या विरोधात नाराजी व्यक्त केली. अखेर सायंकाळी या वितरिकांना पाणी सोडल्यावर शेतकरी शांत झाले.

रब्बी हंगामातील कांदा व इतर पीक पाण्याअभावी जळून चालले आहे. तर पालखेड डावा कालव्यातून वेळेत आवर्तन मिळत नसल्याने हतबल झालेल्या देशमाने येथील गोईजल पाणी वापर संस्थेचे अध्यक्ष योगेश गांगुर्डे, देशमाने खुर्द छत्रपती पाणी वापर संस्थेचे सागर शिंदे तसेच विनायक वावधाने, रवी गांगुर्डे, कैलास आरगडे, बाबासाहेब आरगडे, दत्तू कदम, सोमनाथ आरगडे, नवनाथ गांगुर्डे, नवनाथ आरगडे, वैभव आरगडे, राजेंद्र आरगडे आदींसह शेतकऱ्यांनी मंगळवारी (ता.८) पालखेड डावा कालव्यात उतरून आवर्तनाचे पाणी सोडण्यासाठी अर्धनग्न आंदोलन केले.

पालखेड डावा कालव्याला यंदा सिंचनाचे रब्बीचे आवर्तन उशिरा सुटल्याची तक्रार शेतकरी संघटनेने यापूर्वीच केली असून पाणी आवर्तन उशिरा सुटण्याची चौकशीचीही मागणी करत आंदोलनाचा इशारा दिला आहे. आवर्तन उशिरा सुटल्यामुळे रब्बी हंगामातील पिके जळाली असून या आवर्तनाचा सिंचनाला फायदा होणार नसल्याचे चित्र अनेक ठिकाणी आहे.

देशमाने बुद्रुक येथील गोई आणि देशमाने खुर्द येथील संस्थांच्या लाभार्थी शेतकऱ्यांची पिकेही उशिराच्या पाण्यामुळे जळाली आहे. संतप्त शेतकऱ्यांनी आज चारी क्र.२१ च्या शीर्ष भागात विंचूर शिवारात जाऊन दुपारी बाराला कालव्यात अर्धनग्न होत जलसमाधी आंदोलन केले. पिके तर पाण्याअभावी हातची गेलेली असताना जनावरांचा चारापाणी आणि पिण्याच्या पाण्यासाठी तरी चाऱ्यांना पाणी सोडा अशी आर्त हाक या शेतकऱ्यांनी आंदोलन करताना पालखेड पाटबंधारे विभागाला दिली.

चारी क्र.२१ व २५ या ठिकाणी जाणाऱ्या पाट चारीचे गेट देखील कालव्यावर खोलण्याचा प्रयत्न आंदोलकांनी केला.मात्र पोलिसांनी आंदोलनकर्त्यांना थांबवण्याचा प्रयत्न केला. दुपारी पालखेड प्रशासनाने १० क्यूसेक्सने चारी क्र.२१ ला पाणी सोडल्यानंतर आंदोलन मागे घेण्यात आले.