Protest For Water :सीना-कोळेगावच्या पाण्यासाठी शेतकऱ्यांचे जलआंदोलन

Paranda News : सीना-कोळेगाव प्रकल्पातून साकत मध्यम प्रकल्पात सोडण्यात आलेले पाणी बंद करण्याच्या मागणीसाठी शेकडो शेतकऱ्यांनी बुधवारी (ता.१९) धरण क्षेत्राजवळील परंडा ते सोनारी रोडवरील हरणवडा येथे रास्ता रोको आंदोलन केले.

तर काही शेतकऱ्यांनी सीना-कोळेगाव प्रकल्पाच्या पाण्यात उतरून आंदोलन केले. अधिकाऱ्यांनी पत्र देत पाणी बंद केल्यानंतर हे आंदोलन मागे घेण्यात आले. भोंजा, कुंभेजा, खानापूर, डोमगाव, सोनारी, कौडगाव, डोंजा, आलेश्वर, देऊळगावसह धरण परिसरातील शेतकरी या आंदोलनात सहभागी झाले होते.

सीना-कोळेगाव धरणातून मागील काही दिवसांपासून कालव्या‌द्वारे पाणी सोडण्यात येत आहे; मात्र पाणी सोडण्याचे नियोजन नाही. तसेच कालव्याचे काम ही पूर्ण झाले नसल्यामुले लाखो लिटर पाणी वाया जात आहे. त्यामुळे पाणी साठा दिवसेंदिवस कमी होत असून, धरण परिसरातील उन्हाळी पीक तथा ऊस पिकाचे मोठे नुकसान होणार असल्याचे शेतकऱ्यांचे म्हणणे आहे.

सीना-कोळेगाव धरणातील पाणी साकत प्रकल्पात सोडण्यात यावे, अशी मागणी या भागातील शेतकऱ्यांकडून सातत्याने होत असल्याने सीना-कोळेगाव धरणातून साकत प्रकल्पात पाणी सोडण्यात आले होते. त्यामुळे साकत मध्यम प्रकल्प क्षेत्रातील शेतकरी पाणी आल्याने आनंदित झाले होते.

शेतकऱ्यांना विश्वासात घेणे गरजेचे

प्रकल्पातून कालव्याद्वारे पाणी सोडताना प्रत्येकवेळी शेतकऱ्यांत संघर्ष होण्याची शक्यता आहे. त्यामळे लोकप्रतिनिधी, अधिकाऱ्यांनी शेतकऱ्यांना विश्वास घेऊन पाणी सोडल्यास भविष्यात वाद होणार नाहीत.