Paddy Harvesting : भात काढणीची कामे वेगात; मजुरांची मोठी टंचाई

Mulshi News : मुळशी तालुक्यात भात काढणीची कामे वेगाने सुरू झाली आहेत. मात्र या कामांसाठी मजुरांची मोठी टंचाई जाणवत आहे. काही भागांत मशिनने काढणीचे काम सुरू आहे.

तालुक्यात पावसाने उशिरा उघडीप दिली. त्यामुळे रखडलेल्या भात काढणीने आता वेग घेतला आहे. तालुक्यात शहरीकरण मोठे झाले आहे. तसेच पश्चिम भागातील तरुण मोठ्या प्रमाणावर शहरात स्थायिक झाला आहे.

त्यामुळे शेतात काम करण्यासाठी घरातील माणसे राहिली नाहीत. त्यातच आदिवासी शेतमजूर मिळत नाहीत. भात लावणीस कोकणातील शेतमजूर मिळतात तसे भात काढणीस मिळत नाहीत. त्यामुळे तालुक्यात शेतमजुरांचा मोठा प्रश्न निर्माण झाला आहे, असे साठेसाई येथील शेतकरी संतोष साठे यांनी सांगितले.

दरम्यान, एकमेकाला मदत करत भात काढणी करण्यात येत आहे. तसेच तालुक्यात बाहेरील व्यावसायिकांच्या भात काढणी मशिन येत आहेत. एक तासाला निश्‍चित दराप्रमाणे भात काढणी करत आहेत.

मजूर टंचाईमुळे शेतकरी मशिनने काढणीस प्राधान्य देत आहेत. अनेक शेतकरी काढणी करून खळ्यात उडवी लावून ठेवतात. खरिपाची पेरणी उरकल्यावर भात झोडणी करतात. भात पिकावर करपा रोग गेल्यामुळे उत्पन्नावर परिणाम होणार आहे. भात काढणीचा हंगाम किमान तीन आठवडे सुरू राहील.