Paddy Crop Damage : वीसगाव खोऱ्यात भात पिकास फटका

Pune News : भोर तालुक्याच्या दक्षिणेकडील वीसगाव तसेच आंबवडे खोऱ्यात गुरुवारी (ता ३१) सायंकाळी झालेल्या अवकाळी पावसामुळे काढणीला आलेल्या भात पिकाचे मोठे नुकसान झाले. यामुळे शासनाच्या वतीने त्वरित पंचनामे करून नुकसान भरपाई मिळावी, अशी मागणी नुकसानग्रस्त शेतकऱ्यांनी केली आहे.

वीस गाव खोऱ्यात ढगांचा गडगडाट आणि विजांच्या कडकडाटासह मुसळधार पाऊस झाला. मुसळधार पावसाळा बरोबर सोसाट्याचा वारा देखील वाहत होता.

यामुळे भात खाचरात काढणीसाठी आलेले भाताचे पीक भुईसपाट झाले. काही शेतकऱ्यांची भात काढणी सुरू होती. खाचरातील उभ्या पिकासोबत कापलेल्या भाताचेही नुकसान झाले.

अवकाळी पावसामुळे विसगाव खोऱ्यातील वरोडी खुर्द , वारोडी बुद्रुक, वरोडी डायमुंख , आंबाडे, पाले, बालवडी, नेरे, गोकवडी, बाजारवाडी, हातनोशी, पळशोसी, धावडी आणि अंबावडे खोऱ्यातील चिखलगाव, रावडी कर्नावड, कोर्ले व टिटेघर या गावातील भात पिकाचे मोठ्या प्रमाणात नुकसान झाले.