Water Scarcity : सोमठाणा येथील दुधना मध्यम प्रकल्पात केवळ मृतसाठा शिल्लक

Badanapur News : बदनापूर तालुका आणि नैसर्गिक आपत्ती जणू काही समीकरणच झाले आहे. यावर्षी पुन्हा पावसाने पाठ फिरविल्याने जलस्रोतांमध्ये जेमतेम पाणी आहे. त्यामुळे भविष्यातील टंचाईचे मळभ अधिक घट्ट होताना दिसून येत आहेत. पावसाळा संपत आला, तरी तालुक्यातील महत्त्वाकांक्षी सोमठाणा येथील अप्पर दुधना मध्यम प्रकल्पात केवळ मृतसाठा शिल्लक असल्याने यंदा हा प्रकल्प भरण्याची शक्यता मावळत चालली आहे.

तालुक्याला सातत्याने नैसर्गिक आपत्तीचा सामना करावा लागत आहे. कोरोनाच्या काळात अतिवृष्टी, तर त्यानंतर कोरड्या दुष्काळाचा मारा तालुक्यावर झाला आहे. यावर्षी तालुक्यात जेमतेम पाऊस झाला. त्याची नोंद सरकारी दफ्तरी झाली खरी. मात्र, प्रत्यक्षात जोरदार पावसाअभावी तालुक्यातील जलस्रोत तहानलेलेच आहेत.

सद्यःपरिस्थितीत खरीप पिके वाळत चालली असून, काही पिकांची माना टाकल्या आहेत. मात्र, त्याहीपेक्षा भयंकर म्हणजे आगामी काळात सोसावी लागणारी पाण्याची टंचाईची परिस्थिती होय. तालुक्यातील लघू सिंचन प्रकल्पांत जेमतेम पाणी आहे. मात्र, बदनापूर शहरासह तालुक्यातील काही गावांना पाणीपुरवठा करणाऱ्या दुधना अप्पर मध्यम प्रकल्पात आजघडीला मृत जलसाठा शिल्लक आहे, अशी माहिती दुधना प्रकल्पाचे मोजणीदार पी.के. गुसिंगे यांनी दिली.

वास्तविक बदनापूर तालुक्यात पावसाळा संपला, तरी टंचाईची परिस्थिती कायम आहे. आजही काही गावे टँकर सुरू ठेवण्याबाबत मागणी करीत आहेत. त्यात आता पावसाळा जवळपास संपला. त्यामुळे जोरदार पाऊस होऊन सिंचन प्रकल्प पूर्ण क्षमतेने भरतील, अशी शक्यता राहिलेली नाही.