Water Scarcity : दोन महिने पुरेल एवढाच जलसाठा

Beed News : उन्हाचा पारा वाढत असल्याने पाण्याचा वापर आणि बाष्पीभवनाचा वेग अधिकच वाढला आहे. परिणामी तलावांतील पाणी दिवसेंदिवस कमी होत आहे. उपलब्ध पाणीसाठा हा पुढील दोन महिने पुरेल इतकाच असल्याने तो बेताने वापरावा लागणार आहे. या दृष्टीने संभाव्य टंचाईच्या उपाय येाजनाही प्रशासनाकडून करण्यास सुरवात झाली आहे.

जिल्ह्यातील १६७ प्रकल्पांमध्ये आजघडीला १८३ दलघमी (२३.८८ टक्के) एवढाच उपयुक्त पाणीसाठा आहे. महिनाभरात तब्बल ११३ दलघमी पाणीसाठा कमी झाला आहे. सध्या उन्हाचा पारा वाढल्याने दिवसेंदिवस पाणीपातळी घटत आहे. आता १४५ प्रकल्पांतील पाणीसाठा निम्म्यापेक्षा कमी आहे. तर, ४५ प्रकल्पांतील पाणी जोत्याखाली गेले आहे.

१२ प्रकल्प कोरडेठाक पडले आहे. जिल्ह्याची पावसाची वार्षिक सरासरी ५३६ मिलीमिटर आहे. गतवर्षी तब्बल ८३७ मिलीमिटर एवढ्या पावसाची नोंद झाली होती. त्यामुळे सगळेच प्रकल्प ओसंडून वाहिले. मार्च महिन्यापर्यंत जिल्ह्याची पाण्याची गरज आतापर्यंत भागली गेली.

परंतु, आता प्रकल्पातील पाणी कमी होण्यासह शेतातील विहीरी, सार्वजनिक पाणी योजनेच्या विहीरी, विंधन विहिरीही कोरड्या पडत आहेत. त्यामुळे ग्रामीण भागासह टंचाईच्या झळांचा सामना करावा लागत आहे.जिल्ह्यातील संभाव्य टंचाईचा आराखडा जिल्हा प्रशासनाने तयार केला आहे. संभाव्य टंचाई निवारणासाठी ५८ कोटी ९९ लाख ४९ हजार रुपये निधीची गरज पडणार असून तसे नियोजन सुरु आहे.

प्रशासनाचे नियोजन

यंदा अद्याप जिल्ह्यात एकही टॅंकर नसले तरी जुन-जुलैपर्यंत पाणी टंचाईचा सामना करावा लागणार आहे. त्यामुळे विहिर अधिग्रहण, बोअर अधिग्रहण, टॅंकर सुरु करणे, तात्पुरत्या नळ योजना, जुन्या नळ योजनांची दुरुस्ती, नवीन विहिरी खोदणे, विहिरींतील गाळ काढणे असा संभाव्य टंचाई आराखडा जिल्हा प्रशासनाने तयार करुन आयुक्तांना पाठविला आहे.

अशी आहे जलस्थिती

 भरलेले प्रकल्प : ००

 कोरडे प्रकल्प : १२

 जोत्याखाली पाणी असलेले प्रकल्प : ४५

 ७५ टक्क्यांपेक्षा अधिक पाणी : १ प्रकल्प.

 ५० ते ७५ टक्के पाणीसाठा : ९ प्रकल्प.

 एकूण उपयमुक्त पाणीसाठा : १८३.८३० दलघमी (२३.८८ टक्के)