Marathwada Water Storage : मराठवाड्यातील लघू प्रकल्पात १९ टक्के उपयुक्त पाणीसाठा

Water Shortage : छत्रपती संभाजीनगर : मराठवाड्यातील ७५१ लघू प्रकल्पातील उपयुक्त पाणीसाठा १९ टक्क्यांवर आला आहे. दुसरीकडे ७५ मध्यम प्रकल्पात २७ टक्केच तर ११ मोठ्या प्रकल्पात ४४ टक्के उपयुक्त पाणीसाठा शिल्लक असल्याची माहिती जलसंपदा विभागाच्या वतीने देण्यात आली. झपाट्याने घटत चाललेला पाणीसाठा चिंता वाढविणारा ठरतो आहे. काही भागात पाणीप्रश्न प्रचंड बिकट झाला आहे.

मराठवाड्यात गोदावरी नदीवरील १५ बंधाऱ्यात २६ टक्के उपयुक्त पाणीसाठी शिल्लक आहे. याशिवाय तेरणा, मांजरा नदीत ८९ टक्के उपयुक्त पाणी शिल्लक असल्याची माहिती जलसंपदा विभागाकडून देण्यात आली.

२५ प्रकल्प कोरडे
मराठवाड्यातील ७५ माध्यम प्रकल्पांपैकी धाराशिवमधील एक व ७५१ लघू प्रकल्पांपैकी २४ लघू प्रकल्प कोरडे पडले आहेत. कोरड्या पडलेल्या लघू प्रकल्पात बीड व धाराशिवमधील प्रत्येकी ७, जालना व लातूरमध्ये प्रत्येकी ३ व हिंगोलीतील चार लघू प्रकल्पांचा समावेश आहे.

१९७ प्रकल्पांतील पाणीसाठा जोत्याखाली
नऊ मध्यम व १८८ लघू प्रकल्पातील साठा जोत्याखाली गेला आहे. जोत्याखाली पाणीसाठा गेलेल्या १८८ लघू प्रकल्पात जालन्यातील २३, बीडमधील ५०, लातूरमधील १२, धाराशिवमधील ५४,नांदेडमधील २७, परभणी व हिंगोलीतील प्रत्येकी ११ लघू प्रकल्पाचा समावेश आहे. मध्यम ९ प्रकल्पात नांदेड व बीडमध्ये प्रत्येकी तीन, धाराशिवमधील दोन व जालन्यातील एका प्रकल्पाचा समावेश आहे.

माजलगाव प्रकल्पात सर्वांत कमी पाणी
मराठवाड्यातील माजलगाव प्रकल्पात सर्वांत कमी १८ टक्के उपयुक्त पाणीसाठा शिल्लक राहिला आहे. सीना कोळगावमध्ये २१ टक्के, तर विष्णुपुरी प्रकल्पात ३१ टक्के, मांजरा धरणामध्ये ३२ टक्के, सिद्धेश्वर प्रकल्पामध्ये ३३ टक्के, निम्न दुधनामध्ये ३५ टक्के, जायकवाडी ४३ टक्के, उर्ध्व पेनगंगामध्ये ५१ टक्के, निम्न तेरणामध्ये ५४ टक्के तर येलदरीत ५७ टक्के उपयुक्त पाणीसाठा शिल्लक असल्याची माहिती जलसंपदा विभागाकडून देण्यात आली.