Onion Procurement : ‘नाफेड’साठी कांदा खरेदी बाजार समितीतूनच व्हावी

Nashik News : ‘नाफेड’ची खरेदी शंका कुशंकांच्या गर्तेत सापडली असतानाच कामातील गैरप्रकार खुद्द ‘नाफेड’चे अध्यक्ष जेठाभाई अहिर यांच्या समोर आले आहेत. त्यामुळे शेतकरी उत्पादक कंपनी महासंघांच्या काही खरेदी केंद्रावर नियम डावलून काम होत असल्याचे सिद्ध झाले आहे. त्याचा फटका शेतकऱ्यांना बसत आहे.

त्यामुळे ‘नाफेड’च्या माध्यमातून होणाऱ्या खरेदीवर शेतकरी नाराज असून ही खरेदी ‘नाफेड’ने बाजार समितीच्या माध्यमातून करावी, अशा मागणी नाफेडचे पश्चिम विभाग संचालक केदा आहेर व चांदवड कृषी उत्पन्न बाजार समितीचे माजी सभापती डॉ. आत्माराम कुंभार्डे यांनी अहिर यांच्याकडे केली आहे

अहिर यांनी गुरुवारी (ता. २०) नाशिक कांदा खेरदी केंद्रावर भेट दिली. नाफेडच्या कांदा खरेदीची माहिती जाणून घेत त्यामधील त्रुटी समजून घेण्याकरिता आणि चुकीचे कामकाज करणाऱ्या महासंघ व संस्थांवर कारवाई करण्याचा शब्द शेतकऱ्यांना दिला आहे.

नाफेडची खरेदी सुरू होऊन महिना उलटत आला तरीही पाहिजे त्या प्रमाणामध्ये शेतकऱ्यांकडून कांदा खरेदी झालेला नसल्याचे आढळून आले. त्यामुळे सुरू असलेली कांदा खरेदी कृषी उत्पन्न बाजार समितीच्या आवारामधून करावी, जेणेकरून त्या ठिकाणी स्पर्धा होईल.

शेतकऱ्यांना दोन पैसे जास्त मिळतील आणि ज्या उद्देशाने शासनाने ही खरेदी सुरू केलेली आहे तो उद्देशही सफल होईल. शेतकऱ्यांकडून खरेदी केलेल्या कांद्याचे पैसे तत्काळ डीबीटीअंतर्गत खात्यावर वर्ग करण्यात यावेत, भविष्यात ही खरेदी सभासद संस्थांकडून व विविध कार्यकारी सहकारी संस्थांकडून गावोगावी सुरू करावी अशी मागणी त्यांनी केली.