Onion Seed Production : जळगाव जिल्ह्यात कांदा बीजोत्पादन क्षेत्र कमी होणार

Jalgaon News : जिल्ह्यात कांदा बीजोत्पादनासंबंधीची कांदा बल्बची लागवड सुमारे दीड हजार हेक्टरवर होणार आहे. काही भागात आागाप लागवड झाली आहे. अनेक खरेदीदार कंपन्यांनी दरांची हमी दिली आहे. शिवाय बियाण्यासाठी कांदा किंवा कांदा बल्बचा पुरवठा केला आहे. पण कांदा दर अनिश्चित आहेत. यामुळे क्षेत्र कमी राहील, असे दिसत आहे.

२०२१, २०२२ मध्ये कांदा बिजोत्पादन क्षेत्र जिल्ह्यात दोन हजार हेक्टरपर्यंत होते. कांदा लागवडीऐवजी अनेक शेतकरी कांदा बीजोत्पादनाकडे वळले होते. कांदा बीजोत्पादनासाठी काही कंपन्यांनी पुढाकार घेतला आहे. करार करून घेतले आहेत. त्यात विविध दरांत कांद्याचा किंवा कांदा बल्बचा पुरवठा लागवडीसाठी शेतकऱ्यांना कंपन्यांनी केला.

तसेच खरेदीची हमी दिली आहे. दरही लागवडीपूर्वी ठरवून घेतले आहेत. पण कांद्याचा बाजार अस्थिर आहे. नैसर्गिक समस्या असल्यामुळे कांदा बीजोत्पादनासंबंधीचे कमी होत आहे. यंदा लागवड सुमारे २०० ते ३०० हेक्टरने कमी होईल, असा अंदाज आहे.

कांदा बीजोत्पादनासंबंधी यावल, जळगाव, चोपडा, पाचोरा, जामनेर आदी भागात चांगला प्रतिसाद मिळत असतो. पण या भागात शेतकरी यंदा फारसे स्वारस्य दाखवीत नसल्याचे चित्र आहे.

कांदा बीजोत्पादनासंबंधी प्रतिकिलो ४०० ते ५०० रुपये दर खरेदीदारांनी ठरविले आहेत. यात काढणीसाठी यंत्रणा, मजूर उपलब्ध करून देण्याची हमीदेखील दिली आहे. तसेच खरेदी थेट जागेवर करण्याचे आश्वासन दिले आहे.

काही खरेदीदारांनी खते, फवारणीसाठीची कीडनाशकेदेखील पुरविण्याची तयारी दाखविली. हा खर्च सुरुवातीला कंपन्या करतील. नंतर हा खर्च कपात केला जाईल. सद्यःस्थितीत कांदा बीजोत्पादनासंबंधीची लागवड सुरू आहे. गेल्या आठवड्यातही काही शेतकऱ्यांनी लागवड केली. लागवडीसाठी लाल कांद्याचा सर्वाधिक उपयोग झाला आहे.