Onion Scam: आता इतर कांदा खरेदीदार सहकार संस्थांची चौकशी सुरू

Nashik News: अवसायनात असलेल्या सहकारी संस्थेने कांदा खरेदी मिळवल्याचे समोर आले आहे. त्यानंतर आता राज्य सरकारच्या सहकार विभागाच्या माध्यमातून स्थापन झालेल्या दक्षता समितीसह सहायक निबंधकांच्या माध्यमातून उर्वरित खरेदीदार संस्थांची चौकशी सुरू करण्यात आली आहे, असे जिल्हा उपनिबंधक (सहकारी संस्था) फयाज मुलानी यांनी सांगितले.

दरम्यान, ‘नाफेड’ने खरेदीची पद्धत बदली; मात्र कांदा खरेदीत भ्रष्टाचार सुरूच आहे. काही अधिकारी आणि राजकारण्यांनी संगनमत करून लूट केली आहे. त्यामुळे या खरेदीसंबंधित सर्व अधिकारी व खरेदीदार संस्थांचे प्रतिनिधी यांची सखोल चौकशी होणे गरजेचे आहे. केंद्र सरकारची तिजोरी लुटणाऱ्या खरेदीदार यांच्याविरोधात कठोर कारवाई व्हावी. एवढेच नव्हे तर ‘ईडी’, ‘सीबीआय’ने चौकशी करावी, अशी मागणी महाराष्ट्र राज्य कांदा उत्पादक शेतकरी संघटनेने केली आहे.

याबाबत भारत दिघोळे यांनी सांगितले, की ‘किंमत स्थिरीकरण निधी योजने’अंतर्गत ‘नाफेड’च्या माध्यमातून होणाऱ्या कांदा खरेदीत सातत्याने भ्रष्टाचाराची अनेक नवनवीन प्रकरणे पुढे येत आहेत. अवसायनात गेलेल्या बाळासाहेब ठाकरे अटल नावीन्यपूर्ण सहकारी संस्थेच्या निमित्ताने पहिल्या टप्प्यातील खरेदी संपण्याच्या दरम्यान हा फसवणुकीचा प्रकार समोर आला. मात्र ‘नाफेड’च्या खरेदी केंद्र निवड समितीने कागदपत्रे संबंधित सहकारी संस्थांकडून स्वीकारली.

मात्र शासनाच्या माध्यमातून कुठलीही पडताळणी न करता त्यांना कामे खिरापतीसारखी वाटली आहेत.एकीकडे ‘नाफेड’कडे कांदा विक्री करणाऱ्या शेतकऱ्यांना आधार कार्ड, ई-पीकपाहणी, कांदा लागवडीची सात-बारा नोंद, संलग्न मोबाइल नंबर यांची खात्री झाल्यानंतरच कांद्याची विक्री करता येते. मात्र ज्या संस्था कोट्यवधी रुपयांची कांदा खरेदी करणार आहेत, त्यांना मात्र पडताळणीविना सादर केलेल्या कागद पत्रावरून कामे देण्यात आल्याने मुद्दा तापला आहे.