Solar Power Plant : एक हजार शेतकऱ्यांना मिळणार दिवसा वीज ; अकोला जिल्ह्यात पांगरा आणि माना सौरऊर्जा प्रकल्प कार्यान्वित

Akola News : अकोला : शेतकऱ्यांना सिंचनासाठी दिवसा अखंडित व भरवशाचा वीज पुरवठा करण्यासाठी मुख्यमंत्री सौर कृषी वाहिनी योजना २.० अंतर्गत राज्यात १६ हजार मेगावॉट क्षमतेचे सौर ऊर्जा प्रकल्प उभारण्यात येत असून त्यापैकी तीन मेगावॉट क्षमता असलेला अकोला जिल्ह्यातील दुसरा सौर प्रकल्प पातूर तालुक्यातील पांगरा आणि २ मेगावॉट क्षमता असलेला तिसरा सौर प्रकल्प मूर्तिजापूर तालुक्यातील माना येथे कार्यान्वित करण्यात आला आहे.

या दोन प्रकल्पांमुळे जिल्ह्यातील १०२४ शेतकऱ्यांना दिवसा वीजपुरवठा उपलब्ध होणार आहे.जिल्ह्यात बार्शीटाकळी तालुक्यातील जलालाबाद येथील ३ मेगावॉट क्षमता असलेला सौर प्रकल्प कार्यान्वित करण्यात आल्यामुळे ४५२ शेतकऱ्यांना दिवसा वीज मिळत आहे.

आतपर्यंत जिल्ह्यात जलालाबाद ३ मेगावॉट, पांगरा ३ मेगावॉट आणि माना २ मेगावॉट असे एकूण ८ मेगावॉट क्षमता असलेले तीन सौर ऊर्जा प्रकल्प सुरू झाले आहेत. त्यामध्ये प्रत्येकी ४ मेगावॉट क्षमता असलेले वाशीम जिल्ह्यातील हिसई आणि उंबर्डा बाजार आणि बुलडाणा जिल्ह्यातील ५ मेगावॉट क्षमता असलेला पळशी येथील सौर प्रकल्पाचा समावेश आहे.

मुख्यमंत्री सौर कृषी वाहिनी योजना २.० अंतर्गत पातूर तालुक्यातील पांगरा येथील सौर प्रकल्पामुळे ५४० शेतकऱ्यांना लाभ मिळणार आहे. तर मूर्तिजापूर तालुक्यातील माना परिसरातील २ मेगावॉट क्षमता असलेला या प्रकल्पामुळे ४८४ शेतकऱ्यांना दिवसाला मिळणार आहे.

१०२४ शेतकऱ्यांना लाभ मिळणार

मुख्यमंत्री सौर कृषी वाहिनी योजना २.० अंतर्गत पातूर तालुक्यातील पांगरा येथील सौर प्रकल्प हा १५ एकर शासकीय जमिनीवर उभारण्यात आला आहे. हा प्रकल्प ३३ केव्ही चान्नी उपकेंद्राशी जोडण्यात आला आहे. त्यामुळे ३३ केव्ही चान्नी उपकेंद्रातून निघणाऱ्या ११ केव्ही मळसूर आणि ११ केव्ही पिंपळखुटा या कृषी वीज वाहिनीवरील सावनी, मळसूर, गावनगाव, पहाडसिंगी, पांगरडाटी, आडगाव, वहाडा या गावांतील ५४० आणि मूर्तिजापूर तालुक्यात २ मेगावॉट क्षमता असलेला सौरप्रकल्प हा १० एकर सरकारी गायरान जमिनीवर उभारण्यात आला आहे. उपकेंद्रातून तयार होणारी वीज ३३ केव्ही माना उपकेंद्राव्दारे माना परिसरातील ४८४ शेतकऱ्यांना दिवसाला मिळणार आहे.