Crop Loan : पावणेदोन लाखावर शेतकरी थकबाकीदार

Yavatmal News : जिल्ह्यातील तब्बल पावणेदोन लाख शेतकऱ्यांना कर्जाचा भरणा करणे शक्‍य झालेले नाही. परिणामी, हे शेतकरी थकित ठरल्याने त्यांचा काळ्या यादीत समावेश करण्यात आला आहे. येत्या हंगामात त्यांना कर्जही मिळणार नसल्याने पैसा उभा करण्याचे आव्हान त्यांच्यासमोर आहे.

जिल्ह्यात यंदा राष्ट्रीयीकृत बॅंकांद्वारे १२०४ कोटी रुपयांचे कर्ज वितरण होणार आहे. परंतु गेल्या हंगामातील कर्जाची परतफेड पावणेदोन लाखावर शेतकऱ्यांनी केली नाही. परिणामी, येत्या हंगामात या शेतकऱ्यांना कर्ज कसे देणार, असा प्रश्‍न आहे.

जिल्ह्यातील २६ राष्ट्रीयीकृत आणि खासगी बॅंकांकडे १ लाख ८२ हजार शेतकऱ्यांचे १८५५ कोटी रुपये थकित आहेत. कर्जाची परतफेड न केल्याने बॅंकांनी शेतकऱ्यांना नोटीस बजावली आहे. यातील १४७७ कोटी रुपयांचे कर्ज शेतीसाठी घेण्यात आले आहे.

उर्वरित ३७८ कोटी रुपयांचे कर्ज हे दीर्घमुदत प्रकारातील आहे. एकूणच १ लाख ८५ हजार शेतकऱ्यांना विविध कारणांमुळे पीककर्जाचा भरणा करता आला नाही. परिणामी, हे पावणेदोन लाखावर शेतकरी थकित कर्जदार ठरले आहेत. या शेतकऱ्यांचे खाते ‘एनपीए’मध्ये गेल्यामुळे त्यांना नोटिसाही बजावण्यात आल्या आहेत.

त्यानंतरही कर्जाचा भरणा न केल्यामुळे ते थकबाकीदार ठरले. त्यांना आता खरिपासाठी कर्ज मिळण्याचा मार्ग बंद झाला आहे. त्यामुळे या शेतकऱ्यांना आता पैशाच्या उपलब्धतेसाठी खासगी व्यक्‍तींकडे धाव घ्यावी लागण्याची शक्यता आहे.

पीककर्ज वितरणास विलंब

सेवा सोसायट्यांमार्फत जिल्हा बॅंकेचे कर्ज वितरण होते. त्यासाठी या सोसायट्यांना ठराविक कमिशन दिले जाते. थकित कर्जाची वसुली केल्यास त्यावर अतिरिक्‍त कमिशन देण्याची व्यवस्था आहे. परंतु जिल्ह्यात सोसायट्यांमार्फत दिलेल्या कर्जाची वसुली रखडली होती. त्यामुळे यंदा सोसायट्यांमार्फत कर्जच न देण्याचा निर्णय जिल्हा बॅंकेकडून घेण्यात आला होता. त्यामुळे देखील कर्ज वितरणास विलंब झाला आहे.

आठ टक्‍के कर्ज वितरण

राष्ट्रीयीकृत बॅंकांनी कर्ज भरणा करण्यास ३० जून पर्यंतची मुदत दिली आहे. सद्यःस्थितीत खरिपासाठी ९९ कोटी ७५ लाख रुपयांचे कर्ज वितरित करण्यात आले आहे. उद्दिष्टाच्या ते अवघे आठ टक्‍के आहे.