Coconut Farming : नारळ उत्पादकांसाठी एकदिवसीय कार्यशाळा

Jalana News : नारळ उत्पादन वाढविण्यासाठी आणि त्यांच्या उत्पन्नात वाढ करण्यासाठी नारळ विकास बोर्ड, ठाणे आणि कृषी विज्ञान केंद्र, बदनापूर यांनी संयुक्तपणे एकदिवसीय कार्यशाळा शुक्रवारी (ता. २०) आयोजित केली होती.

या कार्यशाळेत नारळ उत्पादकांना नारळाच्या नवीन पद्धतींची माहिती देण्यात आली. या कार्यशाळेत नारळाच्या विविध जाती, त्यांची लागवड, खत व्यवस्थापन, रोग कीटक नियंत्रण, नारळाचे प्रक्रियाकरण आणि त्याचे विपणन या विषयांवर तज्ज्ञांनी व्याख्यान दिली. या कार्यशाळेत शेतकऱ्यांनी उत्साहात सहभाग घेतला.

त्यांना या कार्यशाळेमुळे नारळ उत्पादनात आधुनिक पद्धतींचा अवलंब करून आपले उत्पन्न वाढवता येईल, असा विश्‍वास व्यक्त केला. नारळ विकास बोर्डाचे उपसंचालक रवींद्रसिंग कुमार म्हणाले, की नारळ उत्पादन हा शेतकऱ्यांच्या उत्पन्नाचा एक महत्त्वाचा स्रोत आहे. या कार्यशाळेच्या माध्यमातून आम्ही शेतकऱ्यांना नारळ उत्पादनातील नवीन तंत्रज्ञानाची माहिती देऊन त्यांना सक्षम करण्याचा प्रयत्न करत आहोत.

डॉ. संजय पाटील, प्रभारी अधिकारी मोसंबी संशोधन केंद्र, बदनापूर यांनी नारळ लागवडी बाबत येणाऱ्या समस्यांबाबत सविस्तर विवेचन केले. कृषी विज्ञान केंद्र बदनापूरचे प्रमुख शास्त्रज्ञ डॉ. एस. डी. सोमवंशी म्हणाले, की आम्ही शेतकऱ्यांना शास्त्रीय पद्धतीने शेती करण्यासाठी प्रोत्साहित करत आहोत. या कार्यशाळेच्या माध्यमातून शेतकऱ्यांना नारळ उत्पादनात आधुनिक तंत्रज्ञानाचा वापर करून अधिक उत्पादन घेता येईल.

प्रगतीशील शेतकरी पांडुरंग डोंगरे म्हणाले, की या कार्यशाळेमुळे आम्हाला नारळ उत्पादनातील बरेच नवीन ज्ञान मिळाले. आपण आता माझ्या नारळ बागेत ही नवीन तंत्रज्ञाने वापरणार आहे.

एकदिवसीय कार्यशाळेच्या कार्यक्रमात रा. कृ. सं. प्र. छत्रपती संभाजीनगरचे सहयोगी संचालक संशोधन डॉ. एस. बी. पवार हे अध्यक्षपदी होते. त्यांनी उपस्थित शेतकरी बांधवांना रब्बी हंगाम पूर्वी लागवड नियोजन बाबत सविस्तर मार्गदर्शन केले कार्यक्रमाचे सूत्रसंचालन डॉ. आर. एल. कदम यांनी तर डॉ. डी. बी. कच्चवे यांनी उपस्थितांचे आभार मानले.