Farmer Compensation: महिला शेतकऱ्याला मोबदला न दिल्याने अधिकाऱ्याचे साहित्य जप्त

Manchar News: ‘‘पुणे-नाशिक राष्ट्रीय महामार्ग मंचर-निघोटवाडी (ता.आंबेगाव) बाह्य वळण रस्त्यासाठी शेतकरी सीमा सुदाम लेंडवे (रा.मंचर) यांची २३ गुंठे जमीन संपादन करण्यात आली. याबाबत भारतीय राष्ट्रीय महामार्ग प्राधिकरण प्रकल्प संचालक संजय कदम यांनी एक कोटी ३९ लाख ८४ हजार रुपये वाढीव मोबदला दिला नाही.

त्यामुळे जिल्हा सत्र न्यायालयाच्या आदेशानुसार पुणे-वारजे कार्यालयातील कदम यांच्या खुर्चीसह संगणक व फॅन आदी साहित्य शुक्रवारी (ता.२१) जप्त करण्यात आले आहे,’’ अशी माहिती लेंडवे यांचे वकील गौरव पोतनीस व अॅड. पल्लवी पोतनीस यांनी दिली.

महामार्गाचा विकास करण्यासाठी निघोटवाडी गावातील लेंडवे यांची जमीन संपादित केली होती. त्यावेळी त्यांना कमी आर्थिक मोबदला मिळाला होता. त्यामुळे त्यांनी अॅड. पल्लवी पोतनीस यांच्या मार्फत लवादाकडे वाढीव नुकसान भरपाई मिळावी म्हणून दावा दाखल केला होता. त्यामध्ये त्यांना वाढीव मोबदला देण्यास लवादाने ३० ऑगस्ट २०२२ रोजी मान्यता दिली होती. सदर रक्कम लवादाकडे जमा करावी म्हणून अनेकदा लेंडवे व त्यांच्या वकिलाने सतत पाठपुरावा केला.

पण राष्ट्रीय महामार्ग विभागाने पैसे भरण्यास टाळाटाळ केली. जिल्हा न्यायालयाचे न्यायाधीश के. पी. क्षीरसागर यांनी जप्तीची अंमलबजावणी करण्याचा आदेश २३ ऑक्टोबर २०२४ रोजी पारित केला. न्यायालयाचे बेलिफ व लेंडवे यांनी शुक्रवारी महामार्गाच्या कार्यालयात जप्ती वॉरंट बजावले.

वॉरंट बजावताना महामार्गाच्या अधिकाऱ्यांनी नेहमीप्रमाणे खोटी आश्वासने देण्याचा प्रयत्न केला व पैसे लवकरात लवकर कोर्टात जमा करू, असे मोघम आश्वासन देत होते. त्यामुळे बेलिफामार्फत लेंडवे यांनी संचालकांची खुर्चीसह अन्य साहित्य जप्त केले आहे. ‘‘वाढीव रकमेचा धनादेश राष्ट्रीय महामार्ग विभागाने देण्यास टाळाटाळ केल्याने साहित्याची जप्ती करण्यात आली. साहित्य न्यायालयासमोर सादर केले जाणार आहे,’’ असे अॅड. गौरव पोतनीस यांनी संगितले. दरम्यान, पुणे-नाशिक राष्ट्रीय महामार्ग प्रकल्प संचालक संजय कदम यांच्याशी सकाळ प्रतिनिधीने संपर्क साधण्याचा पर्यंत केला पण संपर्क झाला नाही.