Fertilizer Linking: रासायनिक खतांच्या लिंकिंगने आता विक्रेतेही त्रासले

Akola News: रासायनिक खतांसमवेत शेतकऱ्यांना लिंकिंगची खते मस्तकी मारण्याचा प्रकार गेल्या काही वर्षांत सर्रास सुरू आहे. याला शेतकरी विरोधही करायचे. मात्र ही साखळी काही तुटता तुटेना अशी स्थिती बनली. आता या लिंकिंगचा विक्रेत्यांनाही त्रास होत आहे. परिणामी, या लिंकिंगबाबत धोरणात्मक निर्णय घेण्याची मागणी वाशीम जिल्ह्यातील विक्रेत्यांच्या संघटनेने जिल्हाधिकाऱ्यांमार्फत शासनाकडे केली आहे.

गेल्या काही वर्षांत नामांकित रासायनिक खते हवी असतील तर त्याबरोबर दुय्यम खते घेण्याचा आग्रह केला जात होता. काही ठिकाणी अशा लिंकिंगशिवाय खते मिळतच नव्हती. प्रामुख्याने डीएपी खताबरोबर सल्फर आणि युरियासह नॅनो युरिया घेणे बंधनकारक केले जात होते. हा प्रकार विक्रेतास्तरावरून होत असावा, असे तेव्हा वाटायचे. मात्र हे कंपन्यांचेच ‘प्रकरण’ असल्याचे विक्रेत्यांनी चालविलेल्या विरोधातून समोर आले आहे.

यंदाच्या हंगामासाठी खत साठवणूक सुरू झालेली आहे. खतांच्या रॅक लागत आहेत. यंदा डीएपी खताबरोबरच सल्‍फरची लिंकिंग सर्रास केली जात आहे. तर युरियासोबत नॅनो युरियासुद्धा बंधनकारक आहेच. मागील काही हंगामात या प्रकाराविरुद्ध शेतकऱ्यांनी ठिकठिकाणी आवाजसुद्धा उठविल्याच्या घटना घडल्या होत्या. आता विक्रेताही या लिंकिंगमुळे भरडत असल्याचे स्पष्ट झाले आहे.

वाशीमच्या विक्रेत्यांनी घेतला पुढाकार

या लिंकिंग प्रकाराविरुद्ध वाशीम जिल्ह्यातील कृषी व्यावसायिक संघाने आवाज उठवला आहे. जिल्हाधिकाऱ्यांमार्फत शासनाकडे निवेदन पाठवण्यात आले. यात म्हटले आहे, की विविध कंपन्यांकडून रासायनिक खतांबरोबर इतर अनावश्‍यक मागणी नसलेल्या खतांचे लिंकिंग करण्यात येत आहे. यापूर्वीच्या तुलनेत मोठ्या प्रमाणात लिंकिंग सुरू आहे. त्यामुळे शेतकऱ्यांच्या नाराजीला सामोरे जावे लागते आहे. आर्थिक नुकसान होत आहे. या विषयाच्या अनुषंगाने राष्ट्रीय स्तरावर धोरणात्मक निर्णय घ्यावा व न्याय मिळावा, अशी मागणी संघटनेचे अध्यक्ष सुनील पाटील, सचिव विजय बगडे, उपाध्यक्ष जयंत हुरकट, कोशाध्यक्ष नितीन पाटणी यांच्यासह इतरांच्या नावे करण्यात आली आहे.