Natural Farming : नैसर्गिकरीत्या पिकविलेल्या पिकांची करणवाल यांच्याकडून पाहणी

Nanded News : लोहा तालुक्यातील दापशेड येथील आर्या नैसर्गिक शेती येथे शिवार फेरीचे आयोजन करण्यात आले होते. या वेळी जिल्हा परिषदेच्या मुख्य कार्यकारी अधिकारी मीनल करणवाल यांनी नैसर्गिक शेती शिवारास भेट देऊन पाहणी केली.

एसपीके तंत्रज्ञानावर असलेली आर्या नैसर्गिक शेती कशी केली जाते, ते करणवाल यांनी सर्व पिकाची पाहणी करून जाणून घेतले. घनामृत, जिवामृत, दशपर्णी घटक बनविण्याच्या पद्धतीची पाहणी केली.

या वेळी आर्या नैसर्गिक शेतीचे प्रमुख गोविंदराव होळगे यांच्यासह त्यांचे कुटुंबीय उपस्थित होते. या वेळी विश्‍वनाथ होळगे यांनी आर्या नैसर्गिक शेतीमध्ये केलेले योगदान, नैसर्गिक शेती कशी केली जाते याविषयी माहिती दिली.

मुख्य कार्यकारी अधिकारी मीनल करणवाल यांनी नैसर्गिक शेती ही काळाची गरज आहे. मानवी आरोग्य चांगले राहायचे असेल तर विषमुक्त अन्न आरोग्यास फायदेशीर आहे.

आर्या नैसर्गिक शेतीचे चाललेले कार्य हे अविरतपणे चालत राहावे कुठलीही अडचण आल्यास प्रशासन त्यांच्या पाठीशी ठामपणे उभे राहील असे त्यांनी बोलताना सांगितले.

कृषी विकास अधिकारी डॉ. नीलकुमार येतवडे, तंत्र अधिकारी अरुण घुमनवाड, मोहीम अधिकारी सचिन कपाळे, लोहा गटविकास अधिकारी आडेराघो, कृषी अधिकारी श्री वावळे यांच्यासह आर्या नैसर्गिक शेतकरी गटाचे सदस्य, उपस्थित होते.