Nashik Rain Damage: वादळी वारे, मॉन्सूनपूर्व पाऊस, गारपिटीने नाशिकमध्ये दाणादाण

Nashik News: नाशिक जिल्ह्यात गेल्या तीन दिवसांपासून ढगाळ वातावरण आहे. मंगळवारी (ता. ६) दुपारनंतर निफाड, चांदवड, सिन्नर, नांदगाव, येवला, मालेगाव, कळवण, बागलाण, देवळा, नाशिक, इगतपुरी, त्र्यंबकेश्वर, पेठ, सुरगाणा व दिंडोरी या तालुक्यांमध्ये पावसाने हजेरी लावली. काही भागांमध्ये वादळी वाऱ्यांसह मॉन्सूनपूर्व पाऊस आणि गारपिटीमुळे दाणादाण उडाली. प्रामुख्याने कांदा, आंबा, डाळिंब बागांसह भाजीपाला पिकांचे नुकसान झाले.

सध्या शेतकऱ्यांची कांदा काढण्याची लगबग सुरू होती. वादळी वाऱ्यासह अचानक आलेला पाऊस व गारपिटीने कांदा उत्पादकांचे मोठे नुकसान केले. अनेक ठिकाणी झाकलेल्या कांद्याच्या पोळीवरील प्लॅस्टिकचे आच्छादने, घरांचे पत्रे हवेने उडून मोठे नुकसान झाले

अनेक ठिकाणी कांदा काढणी, साठवणूक तर कांदा बीजोत्पादन क्षेत्रात डेंगळे तोडणी सुरू होती; मात्र वादळी वारे, गारपिटीने नुकसान वाढले. साठवलेला चारा भिजला तर काही चारा वादळी वाऱ्यामुळे उडून गेल्याचे शेतकऱ्यांनी सांगितले.

कांदा, आंब्याचे नुकसान

वादळी वाऱ्यासह पावसामुळे कळवण, सटाणा, मालेगाव, देवळा, दिंडोरी, नांदगाव, येवला, निफाड, सिन्नर या तालुक्यांत नुकसान वाढल्याचे समोर आले. तर सुरगाणा, नाशिक, त्र्यंबकेश्वर व पेठ तालुक्यांत आंब्याला मोठा फटका बसला. तसेच मालेगाव, सटाणा व चांदवड तालुक्यांत डाळिंब बागांचे नुकसान झाले.