Onion Sale : ‘नाफेड’कडून कांदा विक्रीसाठी दुसरी निविदा

Nashik News : केंद्र सरकारच्या भाव स्थिरीकरण निधी योजनेअंतर्गत रब्बी -२०२४ मध्ये खरेदी केलेला कांदा बाजारात आणण्याची तयारी गेल्या १५ दिवसांपासून सुरू आहे. कांदा विक्रीसाठी हमी दलालांची नियुक्ती करण्यासाठी पहिली निविदा ३० ऑगस्ट रोजी प्रसिद्ध झाली होती. तर बुधवारी (ता. ४) उत्तर प्रदेश आणि उत्तराखंड राज्यांत कांदा विक्रीसाठी दुसरी निविदा प्रसिद्ध करण्यात आली आहे.

बफर स्टॉकमधील ५ लाख टनांपैकी सव्वा दोन लाखांवर रब्बी कांद्याची खरेदी ‘नाफेड’कडून करण्यात आली आहे. हा कांदा बाजारात आणण्याची घाई करण्यात येत असून त्याची प्रक्रिया सुरू आहे.

यापूर्वी मुंबई, बंगळुरू, भुवनेश्वर व पाटणा या शाखेच्या माध्यमातून निविदा काढण्यात आल्या होत्या. याआधी बिहार, ओरिसा व कर्नाटक तर आता ‘नाफेड’कडून देशांतर्गत दुसऱ्या टप्प्यात उत्तर प्रदेश, उत्तराखंड राज्यांत कांदा विक्रीसाठी निविदा काढण्यात आली आहे.

एकीकडे ‘नाफेड’ने ग्राहकाकडून बाजारातील स्पर्धात्मक दराने कांदा खरेदी केलेली नाही. त्यातच दरात चढउतार असताना ‘नाफेड’ने बफर स्टॉक कांदा बाजारात आणण्याच्या हालचाली सुरू केल्यामुळे बाजार अस्थिर झाल्याची स्थिती आहे.