Electricity Bill Recovery : वीजबील थकबाकीदारांविरुद्ध महावितरणची धडक वसुली मोहीम

Hingoli News : अनेक महिन्यांपासून महावितरण कंपनीने सेलू तालुक्यात घरगुती ग्राहकांच्या विज मिटरची रिडींग न घेताच अवास्तव विज बिले दिली आहेत. आता या ग्राहकांकडे थकबाकीचा आकडा वाढला असून अशा थकबाकीदारांविरुद्ध महावितरणने धडक वसुली मोहिम सुरू केली आहे.

ग्रामीण भागातील घरगुती विज ग्राहकांना महावितरण कंपनीने वर्षभर थकलेली एकदम लाखांची विज बिले पाठवल्याच्या ग्राहकांच्या तक्रारी आहेत. यात बहुतांश जणांची तर मिटर रिडींगच घेतलेली नाही. कित्येक जणांचे तर मिटरच बंद आहेत.

ज्यांना ही बिले पाठविण्यात आली त्यांना दोन वर्षांपासून कसलीही बिले देण्यात आली नाहीत, रिडींगही घेतले नाही. नियमित वेळेनुसार बिले दिली असती तर ती भरणे शक्य होते; मात्र ही बिले आता एकदम दिल्याने थकीत बिलांचा आकडा फुगला आहे. पन्नास हजारांवरून लाखांवर बिलाची रक्कम गेली आहे.

त्यावर कळस म्हणून बिलाच्या मुळ रक्कमेवर व्याज लावण्याचा प्रकारही महावितरण कंपनीकडून केला जात असल्याने ग्राहकांतून संताप व्यक्त केला जात आहे. आधीच शेतकऱ्यांच्या कोणत्याही शेतमालास भाव नाही.

यामुळे जगणे अवघड होऊन बसले आहे. सध्या दहावी, बारावीच्या विद्यार्थ्यांच्या परिक्षा सुरू असताना विज वितरण कंपनीने बिल वसुलीसाठी धडक मोहिम हाती घेत, भरता बिल का करू अंधार असा इशारा दिला आहे. महावितरणच्या या मनमानी कारभाराविरोधात ग्रामीण भागामध्ये तीव्र संताप व्यक्त होत आहे.