Modern Farming: शास्त्रज्ञांच्या मार्गदर्शनातून तंत्रशुद्ध शेतीकडे वाटचाल

Buldhana: ‘‘शेतकरी आणि शास्त्रज्ञ यांच्यातील संवाद अधिक बळकट होण्यासाठी विकसित कृषी संकल्प अभियान उपयुक्त ठरणार असून, याच्या माध्यमातून शेतकऱ्यांना नव्या शेती तंत्रज्ञानाची माहिती मिळेल. या माहितीचा वापर करून कमी खर्चात अधिक उत्पादन व नफा मिळविता येईल,’’ असे प्रतिपादन केंद्रीय आयुष राज्यमंत्री तथा आरोग्य व कुटुंब कल्याण राज्यमंत्री प्रतापराव जाधव यांनी केले.

बुलडाणा कृषी विज्ञान केंद्र, कृषी विभाग आणि आत्मा यांच्या संयुक्त विद्यमाने आयोजित शेतकरी मार्गदर्शन कार्यक्रमात ते बोलत होते. कार्यक्रमाच्या प्रारंभी डॉ. पंजाबराव देशमुख यांच्या प्रतिमेचे पूजन करून उद्घाटन करण्यात आले.

कार्यक्रमाला कृषी विज्ञान केंद्राचे वरिष्ठ शास्त्रज्ञ डॉ. अमोल झापे, जिल्हा अधीक्षक कृषी अधिकारी मनोजकुमार ढगे, आत्मा प्रकल्प संचालक पुरुषोत्तम उन्हाळे, केव्हीकेच्या शास्त्रज्ञ डॉ. भारती तिजारे, डॉ. वाडकर, तहसीलदार संतोष काकडे, प्रगतशील शेतकरी प्रतापराव पाटील व परिसरातील शेतकरी उपस्थित होते.

कार्यक्रमात जैविक निविष्ठा, वाचन साहित्य व बीजप्रक्रियेच्या प्रात्यक्षिकांचे दालन उभारण्यात आले होते. प्रास्ताविकात डॉ. झापे यांनी शेतकऱ्यांना कृषी विज्ञान केंद्राशी नियमित संपर्कात राहून उपलब्ध तंत्रज्ञानाचा लाभ घ्यावा असे आवाहन केले.

नॅशनल ब्युरो ऑफ सॉईल सायन्सचे डॉ. निर्मल कुमार यांनी मृदा आरोग्य, बीज निवड, ओलीत व्यवस्थापनाबाबत माहिती दिली. कृषी सखी वंदना टेकाळे यांनी उत्पादन मूल्यवर्धन व प्रक्रिया उद्योगांमधून महिलांसाठी शेतीतील संधी याविषयी माहिती दिली. श्री. ढगे यांनी कृषी विभागाच्या योजनांची माहिती दिली.

श्री. जाधव पुढे म्हणाले, की शेतीच्या आधुनिक तंत्रज्ञानाचा लाभ घेण्यासाठी शेतकऱ्यांनी विद्यापीठ व कृषी विज्ञान केंद्रांशी सतत संपर्कात राहिले पाहिजे. ड्रोनच्या साहाय्याने फवारणी, जैविक कीटकनाशकांचा वापर, मृदा परीक्षण, खतांचे योग्य व्यवस्थापन यामुळे शेती अधिक फायदेशीर होऊ शकते.

बुलडाणा कृषी विज्ञान केंद्र दरवर्षी खरीप व रब्बी हंगामात पिकांचे प्रात्यक्षिक आयोजित करते. शेतकऱ्यांनी येथे भेट देऊन विविध वाणांची माहिती घ्यावी व तज्ज्ञ शास्त्रज्ञांकडून मार्गदर्शन घ्यावे. कार्यक्रमाचे सूत्रसंचालन करीत योगेश सरोदे यांनी आभार मानले.