Solapur ZP : क्षेत्रीय अधिकाऱ्यांच्या दौऱ्यासाठी झेडपीचा ॲप

Solapur News : जिल्हा परिषदेने एक ॲप बनविले असून जिल्हा व तालुकास्तरीय अधिकाऱ्यांना आता गाव भेट दौऱ्याची माहिती त्यात भरावी लागणार आहे. मुख्य कार्यकारी अधिकारी कुलदीप जंगम यांच्या संकल्पनेतून मोबाईल ॲपची निर्मिती करण्यात आली असून लवकरच ते कार्यान्वित केले जाणार आहे.

जिल्हा परिषदेच्या मुख्यालयातील व पंचायत समिती स्तरावरील अधिकाऱ्यांना विविध कामांच्या निमित्ताने गावभेट दौरा करावा लागतो. जिल्हा परिषद शाळा, अंगणवाडी, प्राथमिक आरोग्य केंद्र, पशुवैद्यकीय केंद्र, ग्रामपंचायत कार्यालयांकडून सुरू असलेली विकासकामे आदी विविध बाबींचा यात समावेश आहे. शिवाय वरिष्ठांच्या सूचनेनुसार व चौकशीसाठीही भेटी द्याव्या लागतात. मात्र, अनेकदा नियमित भेटी न देताही कागदी घोडे नाचविले जातात. त्याला आता या ॲपमुळे चाप बसणार आहे.

या ॲपच्या वापराबाबत जिल्हा परिषदेच्या मुख्यालयातील विभागप्रमुखांसह तालुकास्तरीय अधिकाऱ्यांना प्रशिक्षण देण्यात आले. तसेच त्यांना या ॲपचा लॉगिन आयडी व पासवर्डही दिला आहे. अधिकाऱ्यांनी गावांना दिलेल्या भेटीची माहिती कायम संरक्षित राहावी, या दौऱ्यात त्यांना नेमके काय आढळले? याचा अहवाल मुख्यालयात तत्काळ उपलब्ध व्हावा, त्यावर योग्य कार्यवाही करणे तातडीने शक्य व्हावे, यासाठी जिल्हा परिषदेने या ॲपची निर्मिती केली आहे.

अधिकाऱ्यांनी गावभेटीवेळी फोटो काढून तो जिओ टॅग करावयाचा आहे. तसेच अहवालही ॲपवर भरणे बंधनकारक आहे. या ॲपचे नियंत्रण मुख्य कार्यकारी अधिकारी जंगम यांच्याकडे राहणार आहे. त्यांना त्यावर एखाद्या अधिकाऱ्याने किती गावांना भेटी दिल्या, एखाद्या सूचनेनंतर त्याची कार्यवाही केली का, हे त्यांना त्यावर समजणार आहे.

दुसऱ्या टप्प्यात यांचा समावेश

पहिल्या टप्प्यात मुख्यालयातील अधिकारी व तालुकास्तरीय अधिकाऱ्यांचा दौरा ॲपमध्ये समावेश राहणार आहे. दुसऱ्या टप्प्यात अंगणवाडी पर्यवेक्षक, विस्तार अधिकारी, कृषी, शाखा व कनिष्ठ अभियंता, सांख्यिकी विभागाचा समावेश राहणार असल्याचे जिल्हा परिषद प्रशासनाने सांगितले.