Adinath Sugar Factory : ‘आदिनाथ’च्या अध्यक्षपदी आमदार नारायण पाटील निश्चित

Solapur News : आदिनाथ सहकारी साखर कारखान्याच्या चेअरमनपदी आमदार नारायण पाटील यांचे नाव निश्चित झाले असून उपाध्यक्ष पदासाठी दत्तात्रय देशमुख, महेंद्र पाटील, नवनाथ झोळ, डॉ. हरिदास केवार, दादासाहेब पाटील यांची नावे चर्चेत आहेत.

निवडणुकीत आमदार नारायण पाटील यांच्या नेतृत्वाखालील संजीवनी पॅनेलचे २१ उमेदवार विजयी झाले आहेत. तर माजी आमदार संजय शिंदे यांच्या पॅनेलचा पराभव झाला आहे. आता कारखान्याच्या अध्यक्ष, उपाध्यक्षपदाची निवडणूक सोमवारी (ता. २८) कारखाना स्थळावर होणार आहे. सकाळी ११ वाजता ही निवड करण्यात येणार आहे.

आमदार पाटील यांच्या नेतृत्वाखाली ही निवडणूक लढवली गेल्याने अध्यक्षपदासाठी एकमताने आमदार पाटील यांचे नाव निश्चित करण्यात आले आहे. तर उपाध्यक्ष पदासाठी कोणाला संधी मिळणार? हे पाहावे लागणार आहे. कारखाना गेली अनेक वर्षापासून बंद असून हा आर्थिक अडचणीत आहे.

या निवडणुकीत आमदार नारायण पाटील, माजी आमदार संजय शिंदे, प्रा. रामदास झोळ यांनी पॅनेल उभे केले. या तिरंगी लढतीत खरी लढत आमदार नारायण पाटील व माजी आमदार संजय शिंदे यांच्या पॅनेलमध्ये झाली. या निवडणुकीपासून माजी आमदार जयवंतराव जगताप व बागल गट अलिप्त राहिले.

माजी आमदार जयवंतराव जगताप गटाच्या कार्यकर्त्यांनी सुरवातीपासून उघडपणे आमदार पाटील यांना पाठिंबा दिला. तर बागल गटाच्या कार्यकर्त्यांनी शेवटच्या दोन दिवसात आमदार नारायण पाटील यांच्या पॅनेलला पाठिंबा दिला होता.

अकलूज येथील बैठकीत नावाबाबत निर्णय

अकलूज येथे शिवरत्न बंगल्यावर रविवारी (ता. २७) माजी उपमुख्यमंत्री विजयसिंह मोहिते पाटील, खासदार धैर्यशील मोहिते पाटील, आमदार रणजितसिंह मोहिते पाटील, आमदार नारायण पाटील यांच्या उपस्थितीत झालेल्या बैठकीत आमदार पाटील यांचे अध्यक्षपदासाठी एकमुखाने नाव घेण्यात आले. पाच वर्षे आमदार नारायण पाटील हे कारखान्याचे अध्यक्ष राहणार आहेत. तर उपाध्यक्ष पदासाठी इच्छुकांनी आपले म्हणणे मोहिते-पाटील यांच्यासमोर मांडले आहे.