Udgir APMC : वादाचे रूपांतर ठप्प बाजारात! उदगीरच्या व्यापारावर परिणाम

Latur News : गुमास्ता व हमाल यांच्यात बुधवारी (ता. १२) झालेल्या किरकोळ भांडणाच्या वादातून उदगीर येथील अडत बाजार गुरुवारपासून (ता. १३) बंद आहे . या वादात कृषी उत्पन्न बाजार समिती व अडत असोसिएशनने बघ्याची भूमिका घेतल्यामुळे शेतकऱ्यांचा बाजारात विक्रीसाठी आणलेला माल रस्त्यावर पडून आहे.

दोघांच्या वादात शेतकऱ्यांची कोंडी झाली असून आज ना उद्या बाजार सुरु होईल, या आशेने शेतकरी दररोज बाजारात हेलपाटे मारताना दिसत आहे. अडत बाजारात बुधवारी दुपारी सौद्याच्या वेळी मुनीम व हमाल यांच्यामध्ये किरकोळ कारणावरून वाद झाला. एका हमालाने दारू पिऊन हाणामारी केल्याचा आरोप मुनीमाने त्यांच्या गुमास्ता संघटनेकडे केला.

याबाबत गुरुवारी सकाळी मुनीम संघटनेची पदाधिकारी बाजार समितीमध्ये त्या हमालाच्या विरोधात तक्रार करण्यासाठी गेले होते . त्या ठिकाणी योग्य तो प्रतिसाद न मिळाल्याने तो वाद शेवटी सायंकाळी शहर पोलिस ठाण्यात पोचला परिणामी दिवसभर बाजार बंद राहिला.

दरम्यान शुक्रवारी ( ता. १४ ) सकाळी कृषी उत्पन्न बाजार समितीने यार्डातील अडत व्यापारी व खरेदीदार यांना हमालांना ३० ते ३२ रुपये हमाली मातरे दिल्यास कारवाई करण्याची नोटीस देण्यात आली. ही माहिती हमालांना कळताच त्यांनी काम न करण्याची भूमिका घेत कामबंद आंदोलन सुरु केले.

त्यामुळे किरकोळ कारणावरून झालेला वाद विकोपाला गेला असून चार दिवसापासून विक्रीसाठी शेतमाल घेऊन आलेल्या शेतकऱ्यांना रिकाम्या हाताने परत जावे लागले आहे. सोयाबीनची हमीभावाने खरेदी बंद झाल्यानंतर शेतकऱ्यांना अडत बाजाराशिवाय पर्याय उरला नाही.

हमीभावापेक्षा कमी भावाने का होईना घरातील सोयाबीन विक्रीस काढले असतानाच बाजार बंद आहे. यामुळे ऐन लग्नसराईत शेतकरी कोंडीत सापडला आहे. हमीभाव केंद्रावर आधीच रांगेमध्ये ताटकळलेल्या शेतकऱ्यांना सोयाबीनच्या विक्रीसाठी पुन्हा ताटकळत बसावे लागत असल्याने शेतकरी वैतागले आहेत.