Millipede Pest : नवजात अंकुरांवर वाणीचा प्रादुर्भाव

Akola News : या भागात काही ठिकाणी पावसाने हजेरी लावल्यानंतर शेतकऱ्यांनी खरीप पेरणीला सुरुवात केली आहे. अनेक शेतांमध्ये अंकुर फुटू लागले असतानाच आता नवजात पिकांवर प्रामुख्याने कपाशीच्या क्षेत्रात पैसा अर्थात वाणी (मिलीपिड्स) कीडीचा प्रादुर्भाव दिसू लागला आहे. ही कीड नुकत्याच उगवलेल्या पिकांसाठी घातक ठरत असून रोपांचे शेंडे, पाने कुरडत असल्याचे शेतकऱ्यांनी सांगितले.

जिल्ह्यात सार्वत्रिक पाऊस झालेला नसल्याने पेरण्यासुद्धा असमतोल प्रमाणात होत आहेत. सिंचन क्षेत्रात प्रामुख्याने कपाशीची एक जूनपासून लागवड सुरू झाली. या क्षेत्रात कपाशीचे बी अंकुरले आहे. कुठे दोन पाने, कुठे तीन पानांवर पीक आलेले असताना रोपांना या वाणीचा विळखा पडतो आहे.

ही कीड पाने कुरडत आहे. त्यामुळे रोपांची वाढ खुंटणे, संपूर्ण झाड सुकण्याची शक्यता राहते. गेल्या हंगामात सोयाबीन व इतर पिकांवरही ही कीड दिसून आली होती. सध्या या पिकांची पेरणी नसल्याने कपाशीवर अधिक दिसून येत आहे. या कीडीने शेतकऱ्यांमध्ये चिंता वाढवली आहे.

नुकतीच उगवलेली रोपे अत्यंत नाजूक असतात. त्यामुळे वाणी सारख्या कीडींपासून त्यांचे संरक्षण करणे हे अत्यावश्यक आहे. कृषी विभाग, कृषी शास्त्रज्ञांनी तातडीने मार्गदर्शन करण्याची अपेक्षा शेतकरी व्यक्त करीत आहेत.

पंदेकृविचा सल्ला

खरिपात पैसा/वाणी (मिलीपिड्स) या कीडीचा सोयाबीन, कापूस, तूर आदी पिकांवर प्रादुर्भाव होऊ शकतो. ही कीड जमिनीतील आर्द्रतेमुळे सक्रिय होते आणि नवउगवलेल्या रोपांना कुरतडून नुकसान करते. याबाबत डाॅ. पंजाबराव देशमुख कृषी विद्यापीठाच्या कीटकशास्त्र विभागाने सल्ला दिला आहे.

प्रमुख उपाय

पेरणीपूर्वी बीजप्रक्रिया अवश्य करावी

शेतातील काडी-कचरा व गवत साफ करावा रात्री गवताचे ढीग करून सकाळी त्यातील वाणी कीड मिठाच्या पाण्यात टाकावी

पाणी साचणार नाही याची खबरदारी घ्यावी

वेळेवर कोळपणी व शेत स्वच्छ ठेवणे फायदेशीर आहे