Millet Cultivation : सिंधुदुर्गमध्ये भरडधान्य लागवड अभियान राबविणार

Millet Sindhudurg News : सिंधुदुर्ग जिल्ह्यात भरडधान्य लागवड अभियान राबविण्याचा संकल्प किर्लोस विज्ञान केंद्राने केला असून यावर्षी पावसाळी आणि हिवाळी हंगामात ५० हेक्टरवर भरड धान्य लागवड करण्यात येणार असल्याची माहीती विज्ञान केंद्राचे वरिष्ठ शास्त्रज्ञ डॉ. भास्कर काजरेकर यांनी दिली.

काजरेकर म्हणाले, की यंदाचे वर्ष आंतरराष्ट्रीय भरडधान्य वर्ष म्हणून साजरे करण्यात येत आहे. भरडधान्यास ‘श्री’ अन्न म्हटले जाते. भरड धान्य पौष्टिक तृणधान्ये म्हणजे न्यूट्री सिरीयल्स म्हणूनदेखील ओळखली जातात. भरडधान्य ऊर्जा व पोषण तत्त्वांचे आगार आहेत.

ही धान्य पचायला हलकी असतात. जगाच्या अनेक भागांमध्ये भरडधान्य हे स्थानिक पीक आहे. भरड धान्याच्या जगातील एकूण उत्पादनापैकी सर्वाधिक भरडधान्ये भारतात पिकवली जातात व निर्यात केली जातात.

कोकणात सुरुवातीच्या काळात भरडी उताराच्या डोंगराळ जमिनीत मोठ्या प्रमाणात नाचणी, वरई, हरिक व सावा या भरडधान्य पिकांची लागवड केली जायची. परंतु सध्याच्या काळामध्ये ही पिके दुर्लक्षित होत चालली असून या पिकांखालील क्षेत्र नगण्य आहे.

शेतकऱ्यांच्या दैनंदिन आहारामध्येसुद्धा याचे प्रमाण घटले आहे. म्हणून कृषी विज्ञान केंद्राद्वारे या वर्षीच्या पावसाळी व हिवाळी हंगामात ५० हेक्टर क्षेत्रावर नाचणी, वरी, हरिक व सावा या पिकांची लागवड केंद्राच्या व शेतकऱ्यांच्या प्रक्षेत्रावर करण्यात येणार आहे.

नाचणीमध्ये विशेष करून लाल रंगाची व पांढऱ्या रंगाचे नाचणी बियाणे शेतकऱ्यांना उपलब्ध करून दिले जाणार आहे.

तसेच दुर्लक्षित झालेली वरई व सावा या बियाण्यांची उपलब्धता केंद्राद्वारे करून लागवड तंत्रज्ञानविषयी मार्गदर्शन करण्यात येणार आहे. भरडधान्य प्रक्रियेबाबत महिला बचत गटांना प्रशिक्षण कार्यक्रम घेण्यात येणार आहेत.