Rural Economy : म्हसा यात्रेमुळे ग्रामीण अर्थकारणाला गती

Murbad News : ग्रामीण भागातील अर्थव्यवस्थेला चालना देणाऱ्या म्हसा यात्रेत बांबूच्या हजारो टोपल्या विक्रीसाठी आलेल्या आहेत. ग्रामीण भागातील यात्रेकरूंबरोबरच शहरी भागात राहणाऱ्यांनी या रंगीबेरंगी टोपल्या खरेदी करण्यास पसंती दिली आहे. बैल बाजाराच्या जवळच बांबूच्या टोपल्या, सुपे, काठ्या खरेदी करण्यासाठी यात्रेकरू फिरत होते.

सुपांचा उपयोग धान्य, कडधान्य साफ करणे, भाज्या निवडणे व साफ करण्यासाठी होतो. भाज्या, फळे ताजी राहावीत म्हणून ती बांबूच्या टोपल्यांमध्ये ठेवली जातात. कांदे, बटाटे, लसूण ठेवण्यासाठीही गृहिणी बांबूच्या टोपल्यांना पसंती देतात; तर मोठ्या टोपल्या शेतीच्या कामासाठी उपयोगाला येतात.

राबणीसाठी गवत, पाला वाहून नेण्यासाठी शेतकरी मोठे चाफ वापरतात. म्हसा, धसई, टोकावडे परिसरातील आदिवासी, कुणबी, आगरी समाजाचे लोक म्हसा यात्रेच्या दोन-तीन महिने आधीच बांबूच्या टोपल्या, सुपे, फुले ठेवण्यासाठी परड्या तयार करण्याचे काम सुरू करतात. त्यातून मिळणाऱ्या उत्पन्नातून त्यांचा वर्षभराचा किरकोळ खर्च करण्यासाठी पुंजी मिळते. बांबूच्या वस्तू बनवणारे अनेक कारागीर मुरबाड तालुक्यात आहेत.

मेसाचे बांबू व भरीव बांबूपासून विविध वस्तू तयार केल्या जातात. त्याचबरोबर यात्रेत येणाऱ्या तात्पुरत्या दुकानासाठी मांडव तयार करण्यासाठी बांबू वापरला जातो. बांबू काम करणारे कारागीर त्यापासून विविध वस्तू तयार करतात. त्यानंतर या बांबूपासून बनवलेल्या वस्तू आकर्षक दिसण्यासाठी वस्तूंना रंग दिला जातो.

बैलगाडीची विक्री

गुरांच्या बाजारासाठी प्रसिद्ध असलेल्या म्हसोबाच्या यात्रेत यंदा शर्यतीसाठी लागणाऱ्या बैलगाडीसुद्धा विक्रीसाठी आलेल्या आहेत. शेतीच्या कामासाठी बैलगाडी व बैल जोडी घेणारे मालक आता कमी झाले आहेत, तर शौकीन श्रीमंतांचा ओढा आता बैलगाडा शर्यतीकडे वळला आहे. त्यांच्या मागणीप्रमाणे रायगड जिल्ह्यातील खालापूर येथील आत्माराम गावडे या एका व्यापाऱ्याने शर्यतीसाठी लागणारा बैलगाडा विक्रीसाठी आणला होता.