Ashadhi Wari 2025 : पालखी सोहळ्यासाठी सातारा जिल्ह्यात ४६ फिरती वैद्यकीय पथके

Satara News : श्री संत ज्ञानेश्वर महाराज पालखी सोहळा जिल्ह्यात चार दिवस मुक्काम असणार आहे. या पालखी सोहळ्यासाठी सातारा जिल्हा परिषदेचा आरोग्य विभाग सज्ज झाला आहे. वारकऱ्यांना जलद आरोग्य सेवा देण्यासाठी पालखी मार्गावर ४६ फिरत्या वैद्यकीय मदत पथकांद्वारे वारकऱ्यांच्या आरोग्याची काळजी घेतली जाणार आहे.

पालखी सोहळ्यासाठी आरोग्य दूत ही नावीन्यपूर्ण संकल्पना राबविण्यात येणार असून, वारकऱ्यांना आरोग्य दूतामार्फत सेवा पुरविण्यात येणार आहे. यामध्ये दुचाकी वाहनांचा वापर करण्यात येणार असून, दोन आरोग्य कर्मचाऱ्यांमार्फत वारकऱ्यांवर उपचार केले जाणार आहेत.

श्री संत ज्ञानेश्वर महाराज पालखी सोहळा २६ जूनला जिल्ह्यात येणार असून, ३० जून रोजी सोलापूर जिल्ह्यात सोहळा प्रवेश करणार आहे. माउलींच्या पालखीचा लोणंद, तरडगाव, फलटण विमानतळ, बरड असे मुक्काम आहेत. आरोग्य विभागातर्फे प्रतिबंधात्मक व उपचारात्मक पद्धतीने देण्यात येत असलेल्या आरोग्य सेवांसाठी वैद्यकीय अधिकारी, कर्मचाऱ्यांवर जबाबदाऱ्या निश्चित करण्यात आल्या आहेत.

पालखी मार्गावरील पाण्याचे स्रोत व पाणी साठ्यातील पाण्याची नमुन्यांची अनुजैविक व रासायनिक तपासणी करण्यात येणार आहे. जिल्हा आरोग्य अधिकारी, अतिरिक्त जिल्हा आरोग्य अधिकारी, तालुका आरोग्य अधिकारी, वैद्यकीय अधीक्षक, वैद्यकीय अधिकारी व आरोग्य कर्मचाऱ्यांवर जबाबदाऱ्या व कर्तव्ये निश्चित करण्यात आली आहेत.

डेंगी, चिकनगुनिया या आजारांचा प्रादुर्भाव होऊ नये यासाठी विशेष खबरदारी घेऊन पुरेसा औषधसाठा उपलब्ध करून देण्यात आला आहे. वैद्यकीय अधीक्षक, औषध निर्माता, आरोग्य सहाय्यक, आरोग्य सेवक, शिपाई वाहनचालक यांचे जिल्हास्तरावरून वैद्यकीय पथक कार्यरत राहणार आहे. उपकेंद्रावर कार्यरत असलेले समुदाय आरोग्य अधिकारी पालखी सोहळ्यात सेवा देणार आहेत.

आरोग्य विभागाची जय्यत तयारी

पालखी सोहळ्यादरम्यान १६४ वैद्यकीय अधिकारी, ५८६ आरोग्य कर्मचारी, १२ रुग्णवाहिका, ६ ॲम्ब्युलन्स पथक, २ ग्रामीण रुग्णालये, ३ प्राथमिक आरोग्य केंद्र, ५ उपकेंद्र, ४६ फिरती वैद्यकीय पथके, आरोग्य किटसह ६०० कर्मचारी कार्यरत असणार आहेत. आरोग्याच्या सुविधा मिळवून देण्यासाठी आरोग्य विभागाकडून मोठ्या प्रमाणात मनुष्यबळ नेमण्यात येणार असल्याचे जिल्हा आरोग्य अधिकारी डॉ. महेश खलिपे यांनी सांगितले.