Mango Sale : सांगलीतील महोत्सवात २२ लाखांच्या आंब्यांची विक्री

Sangli News : कृषी विभाग सांगली व कृषी पणन मंडळामार्फत सांगलीत २४ ते २६ मे या दरम्यान आयोजित करण्यात आलेल्या आंबा महोत्सवात २२ लाख रुपयांच्या आंब्यांची विक्री झाली. या महोत्सवात ९ हजार डझन आंबा विकला गेला, अशी माहिती कृषी पणन मंडळ कोल्हापूरचे उपसरव्यवस्थापक डॉ. सुभाष घुले यांनी दिली.

उत्पादक ते ग्राहक थेट विक्री'' या संकल्पनेअंतर्गत सांगलीत २४ मेपासून तीन दिवस आंबा महोत्सवाचे आयोजन करण्यात आले होते. या महोत्सवात ३५ शेतकऱ्यांनी ४७ प्रकारच्या विविध जातींचे आंबे प्रदर्शनात ठेवले होते.

ग्राहकांना कोकणातील अस्सल हापूस आंबा व स्थानिक केशर आंबा उत्पादकांकडून विक्रीसाठी उपलब्ध करण्यात आला होता. हापूसला दर ४००, तर केशरला २५० ते ३०० रुपये प्रति डझन दर मिळाला. या वेळी रत्नागिरी, सिंधुदुर्ग, कोल्हापूर, सोलापूर व सांगली जिल्ह्यांतील ३५ शेतकऱ्यांनी ४७ प्रकारचे आंबे ठेवले होते.

यामध्ये रत्नागिरी हापूस, देवगड हापूस, स्थानिक केशर आंबा, या बरोबरच राजूमन, करुठा कोलंबन, हिमायुद्दीन, सुवर्णरखा, ब्लॅक कोलमन, तोतापुरी, कोंडूर गोवा, नाजुद पसंद, सन्नू-कल्ल, बिलाय कोलंबन, बनेशान, केसर, जहांगीर, काळा गंडरस आंबे प्रदर्शनात ठेवण्यात आले होते. याचे संयोजन कृषी पणन मंडळ कोल्हापूरचे उपसरव्यवस्थापक डॉ. सुभाष घुले व कृषी विभागाने केले.