Kolhapur Market Rate : आंब्याचे दर आवाक्यात तर भाजीपाला दरात तेजी, काय आहे मार्केट स्थिती?

Mango Rate : उन्हामुळे बाजारातील भाजीपाल्याची आवक घटल्याचे दिसून येत आहे. जिल्ह्यातील बाजारात २० टक्क्यांनी आवक घटली आहे. दरम्यान बाजारातील आवक कमी झाली असली तरी फळभाज्यांचे भाव नियंत्रणात आहेत, मात्र पालभाज्यांच्या दरात थोडी वाढ झाली.

घाऊक बाजारपेठेत साडेसात रुपयाला एक मिळणारी मेथीची पेंढी भाजी मंडईतील किरकोळ बाजारपेठेत १५ रुपयाला एक असा दर झाला. दरम्यान, हापूस आंब्याची आवक वाढल्याने दरही काही अंशी कमी आले आहेत.

येथील शाहू मार्केट यार्डातील भाजीपाला बाजारपेठेत रोज सरासरी १५० गाड्या भाजीपाल्याची आवक होत आहे. उन्हामुळे पन्नास गाड्या मालाची आवक घटली आहे. यात स्थानिक पातळीवर ७० ते ८० टक्के भाजीपाल्याचे सौदे होतात. उर्वरीत गाड्यातील माल कोकणात पाठवला जात आहे. उन्हामुळे फिरस्ती भाजीविक्रेत्यांकडून भाजीपाला कमी प्रमाणात खरेदी केला जात आहे.

त्यामुळे फिरस्त्या विक्रेत्यांकडून भाजीपाला कमी घेतला जात आहे. मंडईत बसणाऱ्या विक्रेत्यांकडून जास्त प्रमाणात भाजीपाला घेतला जात आहे. सायंकाळी भाजी मंडईत खरेदीसाठी गर्दी होत आहे. यात फळभाज्या नियमित भावात विकल्या जाताहेत, तर पालेभाज्या मात्र दुप्पट भावात विकल्या जात आहेत. उन्हामुळे पालेभाज्या खरेदी होऊन भाजीपाला विक्रेत्यांचे नुकसान होते म्हणून पालेभाज्यांचे भाव वाढल्याचे यासीन बागवान यांनी सांगितले.

उन्हाळ्यामुळे शीतपेय दुकानात तसेच स्टॉल्सवर फळांची मागणी आहे, तर घरगुती स्तरावरही पाणीदार फळांना मागणी जास्त आहे. यात मोसंबी, संत्रीची आवक व मागणीही जास्त आहे. दर दोन दिवसाला सरासरी १४ ते १८ टन फळांची आवक आहे. त्यामुळे भाव फारसे वाढलेले नाहीत. द्राक्षांचा हंगाम शेवटच्या टप्प्यात आहे.

ढगाळ वातावरणामुळे आवकेत वाढ

कोकणी हापूस आंब्याची आवक गेल्या दहा दिवसांत वाढली आहे. कोकणात ढगाळ वातावरण झाले. कोल्हापुरात पाऊस झाला, त्यामुळे भावही नियंत्रणात आले आहेत. कोल्हापूर शहरात ठिकठिकाणी लावलेल्या स्टॉल्सवर थेट कोकणी हापूस दोनशे ते तीनशे रुपये बॉक्स, तर दीड हजार रुपयेला पाच डझनाची पेटी अशा दरातही विक्री होत आहेत. तर बाजार समितीत येणाऱ्या आंब्याचे भाव थोडे जास्त आहेत. दक्षिणेतूनही आंबा विक्रीस आला आहे. तो आंबा कोकणी हापूस आंब्याच्या तुलनेत स्वस्त आहे.